aiaraldea.eus

Nerbioi ibaiko utzikeria eta usain txarra salatu dute Bañuetako bizilagunek

Erabiltzailearen aurpegia Izar Mendiguren Cosgaya   Jendartea  Amurrio

Bañuetako bizilagunek usain txarra salatzeko elkarretaratzea egin zuten atzo Juan Urrutia plazan.

Txakolin Eguna baliatuta, mobilizazioa deitu zuten atzo Bañuetako bizilagunek. Hain zuzen, 12:00etan egin zuten elkarretaratzea herriko plazan. Auzokideen Elkarteak deituta, 50 lagun inguru elkartu ziren.

"Bañueta, Amurrio eta inguruko auzikideak batu eta gero, ondokoa salatzen dugu: Nerbioi ibaiaren utzikeria eta obren etengabeko atzerapena dela-eta, araztegi berriaren beharra eta ibai-ertzaren behin betiko saneamendu egokiaren premia", adierazi dute prentsa oharrean.

25 urteko aldarrikapena
25 urte daramatzate aldarrikapen bera egiten, Aiaraldea hedabideari adierazi diotenez. Mamen Lopez elkartekidearen aburuz, soluzioa ezinbestekoa da: "Ez bakarrik gugatik eta guretzako, baizik eta hurrengo belaunaldien mesederako ere".

Protesta luzea da Bañuetako bizilagunena: "Kloaka guztiak gure auzoan ateratzen direlako". Zentzu horretan, URA agentziaren jarrera kritikatu dute, "hipokrisia da esaten dutenean ibaia garbi dagoela, hiruzpalau herri ditugu araztegirik gabe".

Obrak lizitatuta dauden arren, lehenbailehen hastea eskatu dute, kirats guztia euren inguruan pilatzen baita.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa