Udako kanpaina aurkezteko jaia egingo du bihar -larunbata- Amurrioko Gazte Asanbladak. Agerraldia egingo dute arratsaldeko seietan Juan Urrutia plazan. “Kaleak hartu” ekimena egingo dute jarraian, eta Elexondo pasealekura mugituko dira gero. Parrillada, txosna eta Perdido Entre Ilusiones musikari amurrioarraren kontzertua egongo dira bertan, zazpietatik aurrera.
Azken hilabeteetan hausnarketan murgilduta egon dira gazte asanbladako kideak. Hausnarketa horien ondorioak dira bihar plazaratuko dituztenak. Aurreratu dutenez, “hiru ildo nagusi” jorratuko dituzte aurrerantzean: Kalea, Gaztetxea eta Eskualdeko Gazte Asanbladak. “Hiru ildo horiek lantzeko kanpaina bat abiaraztea pentsatu genuen”, azaldu dute, “asmoa uda honetan gazteak aktibatu eta kaleak hartzea da, horregatik Kalea gurea da! izenarekin bataiatu dugu kanpaina. Uda kalean egoteko eta kaleak (ber)pizteko urtarorik hoberena denaren ustean baikaude”. Hainbat motatako ekintzak garatu nahi dituzte horretarako datozen hilabeteetan: udako zinema, akelarrea, kaleko eskola, Tologorriko aterpetxean egonaldia, txangoak eskualdetik barrena... “Hilabete guztietako egitaraua larunbat honetan argitaratuko dugun arren, asmoa izango da hilero zehatzago argitaratzea”.