Araba Euskaraz 2020

Amurrion ospatuko da Araba Euskaraz jaiaren hurrengo edizioa, Aresketa Ikastolaren eskutik

Amurrion ospatuko da datorren urteko Araba Euskaraz Jaia. Gasteizko Armentia Ikastolak antolatu du gaur jai horren aurtengo edizioa, eta goizean eginiko ekitaldian pasatu diote lekukoa Amurrioko Aresketa Ikastolako kideei.

Lekuko aldaketaren ekitaldia “polita eta dinamikoa” izan da, Eneko  Aldairen hitzetan. Aresketa Ikastolako lehendakariak datorren urteko jaiari begirako hainbat gauza aurreratu ditu. “Helburua izango da eskualdean euskara bultzatzea, festa inklusibo baten bidez”. Ikasleen eta Aiaraldeko zein Euskal Herriko sortzaileen arteko elkarlana sustatu nahi dute horretarako. “Gazteak gonbidatu nahi ditugu euskaraz gozatu, sortu eta komunikatzera”. Gauzak hala, euskararen alde lanean dabiltzan Aiaraldeko eragile eta talde guztiei luzatu diete ekimenean parte hartzeko gonbita. “Erronka zaila da esku artean duguna, baina baita polita ere”.

Lau aldiz ospatu da ikastolen aldeko jai hori Amurrion. 1986. urtean izan zen lehen aldia, 1996an bigarrena, 2005ean hirugarrena eta 2013an, aldiz, azkena. Laudion ere hainbat aldiz ospatu da festa: 1983. urtean, 1993an, 2000an eta 2011n. Leloa oraindik ez dute aurkeztu, baina ekainaren 14an izango da festa.

Argazkiak: Jon Catalan

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide