Aspalditik da txirrindularitzaren jarraitzaile sutsua Ixone Núñez amurrioarra. Aiaraldeko beste zenbait herritarrek bezala, uztaila osoan zehar jarraitu du Frantziako Tourra. Batzuetan, telebistatik; eta besteetan etapara bertaratuta.
Hain zuzen, uztailaren 16tik 21era joan zen Frantziara. Ez zuten udako plan makala prestatu: "Taldeko gehiengoak txirrindularitza praktikatzen dugula aprobetxatuz, Pirineotako portu ospetsuenak igo ditugu, eta zonaldea inguratzen duten herrixkak bisitatu". Atsedenerako Luz-Saint Sauveur herriko kanpina hautatu zuten, hiru etapa ikusteko: "Birritan joan ginen bizikletarekin. Paun egindako erlojupekoan ere izan ginen".
"Oso giro ona"
Giroa nabarmentzen du Núñezek Tourretik. "14 pertsonako taldea batu ginen eta gure artean oso giro ona eta alaia izan genuen, gehienek txirrindularitza modu batean edo bestean gustuko dugu; eta horrek asko errazten du disfrutatzea". Lagunartetik harago, Tourreko giroaz mintzo da: "Ikaragarria da; data oso aproposak dira, eta horrek jendetza pilatzea eragiten du. Tourmaleteko etapa ikustera joan ginenean, igoera guztian kotxeak, furgonetak eta autokarabanak ikusi zitezkeen". Gidariak ere partaide bihurtzen direla dio, "berdin zaie euskalduna, kolonbiarra edo txinatarra izatea. Bizikleta dugu gustuko eta horrek lotzen gaitu".
Emozioz bizi du txirrindularitza amurrioarrak, eta Tourra zer esanik ez: "Txirrindulariak hain gertu ikusteak emozio handia sortzen du. Tourmaleteko etapan oso gertu izan genituen igotzen zuten bitartean eta Landa, Peio Bilbao, Gorka Izagirre edo Omar Fraile -beste batzuen artean- gertutik animatzen eta ikusten asko disfrutatu genuen".
Esperientziatik zer gustatu zaion gehien galdetuta, Tourmaleten kanpin-dendan igarotako gaua du gogoan: "Aukera hori Tourrak soilik eskaintzen du".
Argazkiak: Ixone Núñez
![[DEBATEA] Tour-ari buruzko mahai-ingurua](https://aiaraldea.tok-md.com/argazkiak/qEx/cache/Secuencia%20Grafismos.Imagen%20fija008_tokikom_100x75.jpg)