aiaraldea.eus

“Premiazko bi mozio eztabaidatzea” eragoztea leporatu die EH Bilduk EAJ eta PSE-EEri

Erabiltzailearen aurpegia Erredakzioa   Politika  Amurrio

Tafallako uholdeei buruzkoa zen testuetako bat, aldaketa klimatikoari buruzkoa bestea. Iragan osteguneko Udal Osoko Bilkuran aurkeztu nahi izan zituzten biak.

“Premiazko bi mozio eztabaidatzea” eragoztea leporatu die EH Bilduk EAJ eta PSE-EEri
Iñaki Ibarluzea, EH Bilduko bozeramailea, artxibo irudi batean. / Aiaraldea.eus | Ikusi handiago | Argazki originala

Amurrioko EH Bilduk prentsa-oharra plazaratu du iragan osteguneko Udal Osoko Bilkuran egondako eztabaida baten harira. Koalizioak bi mozio aurkeztu zituen gai ordenatik kanpo, Tafallako uholdeei buruzkoa bata eta aldaketa klimatikoari buruzkoa bestea. Baina ezin zain zuten ez bata ez bestea eztabaidatu, testuak gai ordenan sartu edo ez bozkatzerako orduan EAJ eta PSE-EEk aurkako botoa eman zutelako.

Eztabaida piztu zen orduan EH Bilduko kideen eta Josune Irabien alkatearen artean, bideo honetan 50. minututik aurrera ikusi daitekeenez:

Orain plazaratu duen prentsa-oharrean, bi mozio horiek premia eta garrantzia nabarmendu du EH Bilduk, “gehiengo zabala eta argia” merezi zutela nabarmenduta. “Irailaren 16an gai hauek eztabaidatu zitezkeen udaletxean egin ziren batzorde informatiboetan, baina, ez zen hala izan. Egoera hori ikusita, EH Bildu Amurriok biak urgentziaz aurkeztea erabaki zuen irailaren 26ko osoko bilkuran”.

Horrez gain, koalizioak azaldu du udal gobernuak mozioak bidaltzeko epeak eraman zituela ezeko botoa justifikatzeko argudio gisa. “Puntu honetan argitu behar dago argumentu gisa erabili diren bidalketa epe horiek a posteriori ezarri zirela, mozio horiek aurkeztu ondoren. Beraz, gai hauek mahai gainean jarriko ditugu Amurrioko Udalak bere burua kokatu dezan eta bi gai horiei dagozkien akordioak har ditzan”.

Josune Irabien alkateak, bere aldetik, plenoan adierazi zuen lasaiago eztabaidatzea pena merezi zuela, adostasun handiagoa lortzeari begira (goiko bideoan ikusi daiteke bere interbentzio osoa).

Elkartasuna Tafallarekin
Mozioak plenoan lantzerik izan ez duten arren, EH Bilduko kideek elkartasuna helerazi nahi izan diete Tafallaldeko herritarrei, eta udalek martxan jarri dituzten "auzolan ekonomikoetan” parte hartzeko deia luzatu dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa