Aresketa Ikastolak irailetik ekin dio jantokiko menuak tokiko produktuekin prestatzeari. “Guraso talde batek ikastolako agendan 2017/2018 ikasturtean kokatu zuen” azaldu du zuzendaritzak.
Berez, aldaketaren helburua da "eredu jasangarriago eta osasungarriagorantz jotzea, non heziketa proiektuaren eta gure ingurumenaren koherentzia islatuko den”.
Prozesua gauzatzeko Urduñako Eskola izan da erreferentea eta Kataluniako “Menjadors Ecologics” taldearen aholkularitza profesionala izan dute. Zentzu batean, funtzionamendu orokorra ez da gehiegi aldatu: “lehendik ere jantokia eta sukaldea genituen ikastolan eta menuen elaborazioa bertan egiten zen”.
Hala ere, sukaldeko tresnerian hobekuntzak egin dituzte, eta sukaldariek trebakuntza jaso dute, produktu freskoekin eta errezeta berriekin lan egiteko. Esan bezala, Urduñako Herri Ikastetxearekin elkarlanean ari dira: “Platerak eta produktuak aukeratzeko orduan, eurekin partekatzen ditugu menuak, modu horretan erosketak eta elaborazioak egiterakoan gure esperientziak partekatu eta modu eraginkorragoan funtziona dezakegu”.
300 menutik gora
Gainera, menua Menjadors Ecológics taldeak, María Manera nutrizionistak eta Aresketako sukaldari taldeak prestatu dute.
Bilakaera horri esker, egunero 300 menutik gora eskaintzen dituzte Aresketa Ikastolako jantokian, gertukoak eta ekologikoak diren eguneko barazkien kontsumoa bermatuta, eta aurreprestatutako elikagaiak baztertuta.
