Amurrioko Judo Klubak bere nazioarteko txapelketaren XXXVI. edizioa antolatuko du datorren larunbatean, azaroak 16, Bañueta Kiroldegian.
Norgehiagoka haur eta kadete kategorietako partaideentzat bakarrik izango da eta goizeko hamarretan hasiko da haurrekin, arratsaldeko hiruretatik aurrera jarraitzeko kadeteekin. Hurrengo egunean, gainera, senior kategoriako Espainiako Kopako sektore bat jokatuko da kiroldegian bertan.
Klubeko entrenatzailea den Eduardo Gonzalezen arabera, “anbizio handiko” txapelketa antolatuko dute, bi kategorietako mutilek eta neskek parte hartuko dutelako.
Gainera, aurtengo zein iazko lehiaketa sistemak goraipatu ditu Gonzalezek, aurreko bost urteetako Superkoparekin alderatuta: “Partaideek bi borroka egin ahalko dituzte gutxienez eta era erlaxatuagoan lehiatu ahalko dira, baina ez da errazagoa izango”.
Parte hartzeko ezinbestekoa izango da antolakuntzak erraztutako helbide batean izena ematea. Senegaleko herri bateko judo taldeari emango diote bildutako diruaren zati bat. “Proposamen honek pasaden urtean izandako harrera ona ikusita, aurten ere mantendu nahi izan dugu Senegaleko taldea laguntzeko ekimena ”, zehaztu du entrenatzaileak.