Amurrioko ikasketa gelen inguruko eztabaida urtarrilera atzeratu izana aurpegiratu dio EH Bilduk udalari. Oposizioko taldeak ezinbestekotzat hartu du ikasketa gelen egoeraren hobekuntza, eta “azterketa garaia” dela gaineratu du ohar baten bidez. Halaber, udal gobernuari “bereak ez diren proposamenak” oztopatzeko ahaleginak egitea leporatu dio.
Gainera, udalak bere “gabeziak estali” nahi dituela uste du oposizioko taldeak, ikasketa gelei dagokien proposamena hedabideetara bidali zuten egun berean, abenduaren 9an, udalak liburutegiko eta Reforreko Gabonetako ordutegiak argitaratu zituela argudiatuta. Hortaz, “gardentasuna” exijitu eta talde guztien proposamenen aldeko apustua egitea eskatu diote udal gobernuari.
Antzokirako arauak
Antzokiaren erabilera arautzea ere eskatu du EH Bilduk, “arau zehatzen faltak kontraesan eta desorekak sortzea ahalbidetzen duelako”. Datorren urtean arautegi proposamena aurkeztuko dutela aurreratu dute talde politikoko kideek, betiere “espazio kulturalen garrantzia kontuan hartuta eta herritarren eskubideen bermea lortze aldera”.
Kuxkumendiko sarrerak
Era berean, Amurrioko Kuxkumendi mendira Olentzero bisitatzera joateko sarrerak saltzeko sistema kritikatu du EH Bilduk. Oposizioko taldearen arabera, pertsonako gehienez "bost edo sei sarrera” saltzeko irizpidea hartu beharko luke udalak, eta erabilitako metodoa “bidegabea” dela esan du, tiketak “mugarik gabe” saldu direla argudiatuta.