Aurten eraildako emakumeak oroitzeko, Gabonetako zuhaitz bat jarriko da gaur 18:00etan Amurrioko Mendiko kaleko parkean. Modu berean, 55 bola more jarriko dituzte apaingarri zuhaitzean, bana aurten Espainiar Estatuan eraildako emakume bakoitzeko. Bola bakoitzak lazo bat eta hildako emakume baten izena idatzia duen etiketa bat izango du.
Amurrioko Udalaren eta Aisia Eskaut taldearen artean sortutako ekintza honek genero indarkeriaren kontrako “konpromiso sendoa” erakustea izango du helburu, baita biztanleak heztea, prebenitzea, sentsibilizatzea eta kontzientziatzea ere, udalak ohar batean adierazi duenez. Gainera, herritarrei eta elkarteei “borroka aktiboa” eskatu diete, indarkeriari amaiera emateko.
Eskaut taldeak argitu duenez, bi urte daramatzate “bidegabekeriei” buruzko gaiak lantzen, eta “garrantzitsuenetakoa" genero indarkeria eta matxismoa dira. “Txikienek” desberdintasunek “hor jarraitzen dutela” ikustea izango da ekimenaren xedea. Bestalde, Berdintasun Saileko zinegotziak, Ixone Saratxagak, emakumeen aurkako indarkeria “gizarteko desberdintasun sinbolo basatiena” dela adierazi du, giza eskubideen bortxaketa dela argudiatuta.