[IRITZIA] Amurrio erdian opari berezia egongo da

Aurten, Amurrioko hiri erdian opari bereziak ditugu, eta ez Olentzerok edo Errege Magoek ekarrita, udalak berak ekarriko dizkigu.

Orain dela gutxi, neuk eskatu nion auzo begirale bati Udaltzaingo aurrean zegoen eskailera txiki bat kentzeko. Bat-batean, udalekoek 1,7 metroko harresi bat oparitu digute liburutegiko sarrera estaltzeko; eta udaltzainei, haien bulegora sartzeko, hamabi eskailerako eskalinata oparitu dizkiete. Horrelako opari berezi gehiago zin egin dizkigute.

Baina oparirik onena gasolindegian eraiki nahi dutena da, biribilgunea, alegia. Egun, autoak betiko moduan egiten dituzte joan-etorriak Alturriagatik, oinezkoen pasabidean beharrezkoa denean geldituta. Udalekoek hori aldatu nahi dute, ez dakit zergatik.

Aurrerago, gidariek pasatzen utzi beharko dute biribilgune berrian sartzean eta, bai sartzean eta bai irtetean, kontu handiz ibili beharko dira beste autoekin, oso estua delako. Bizkaibusa etorriko balitz lekurik ez lukete izango. Istripuak, aldiz, ugari izango lirateke.

Gu, oinezkoak, biribilgune inguruan ibiliko gara: orain lau pausotan egiten duguna gero hamalau pausotan egingo dugu. Txirrindulariek ez dute inoiz bidegorria erabiliko, eta dagoen leku guztia beteko du biribilguneak. Benetan opari txarra da biribilgunea.

Denbora dugu oraindik. Nik, badaezpada, Olentzerori eskatuko diot proiektua aldatzea. Adibidez, enparantzako pasalekua Etxegoien bideraino luzatuz. Horrela leku gehiago izango dugu edozertarako, baita diru gehiago ere. Udalekoek azalpen asko eman beharko dituzte proiektua ez aldatzeko.