Leire Ugarriza Zaraobeko zuzendariordeak eta Ikaslaneko ordezkariak, Xabier Lopez de Santiago Egibide ikastetxeko eta Hetelemeko kideak, Lexuri Ugarte Aretxaga Arabako Foru Aldundiko Euskara eta Gobernu Irekiko zuzendariak eta Olatz Imaz Lanekiko kudeatzaileak hartu dute parte ekitaldian.
Gaurko aitortzaren bidez Mubea Inauxan ikasleen prestaketa eta duala euskaraz eskaintzea saritu dute. Finean, oroigarria eman diete Lanekiko ordezkariek enpresako arduradunei. Olatz Imaz egitasmoaren sustatzaileak azaldu duenez, euskaraz egiten dute ikasleek Mubea Inauxan lantokiko prestakuntza eta duala, "hori izan da aitortu nahi izan duguna".
Lanekiren bidez, Arabako Foru Aldundiak zigilua banatzen die hizkuntzarekiko konpromisoa adierazten duten enpresei. "2019an 174 ikaslek egin dituzte Araban praktikaldiak euskaraz. Zerbitzu hori 128 enpresetan eskaini da", zehaztu du Lanekiko kudeatzaileak.
Lexuri Ugarte Aretxagak Arabako Foru Aldundiaren konpromisoa ekarri du gogora. Hala, Euskaraldiaren bitartez 2020an "arigune" gehiago sortzeko apustua egingo dela aurreratu du, eta dei egin die ikasle, herritar zein lantegietako beharginei ekimenera batu daitezen. Ekitaldiaren ondoren, bisita gidatua egin dute enpresan barrena.