aiaraldea.eus

Esklerosia ikertzera bideratuko dute San Anton azokako dirua

Erabiltzailearen aurpegia Izar Mendiguren Cosgaya   Jendartea  Amurrio

Urtarrilaren 19an egingo dute azoka. Ohi bezala, enkantea izango da ekintza izarra. Aurten pilatutako dirua esklerosi amiotrofikoaren ikerkuntzara bideratuko dute. 

Esklerosia ikertzera bideratuko dute San Anton azokako dirua
Jendetza erakartzea espero dute aurten ere antolatzaileek. / Aiaraldea | Ikusi handiago | Argazki originala

San Anton Armuru azoka egingo dute datorren igandean Amurrion. Goiz osoko ekimena izango da, baina 12:30ean espero dute biltzea jende gehien.

Izan ere, ordu horretan izango da enkantea. Hala, lortutako dirua alboko esklerosi amiotrofikoa ikertzeko emango dute antolatzaileek, jakinarazi dutenez. 

Gainontzekoan, kale animazioa eta azoka izango dira nagusi. Hain zuzen, postu ugari kokatuko dituzte San Anton plazaren inguruetan, eta nola tokiko hala kanpoko ekoizleen lanak ezagutzeko zein erosteko aukera eskainiko dute.

Horrez gain, Ugarte otxotearen kantu emanaldia edukiko dute bertaratzen direnek, eta goizean goiz meza egongo da. 

Antolatzaileen esanetan, oraindik aukera dago postua jartzeko baimena eskatzeko. Interesdunek 664081883 telefono zenbakira hots egin beharko dute horretarako.

Aurreratu dutenez, urtero moduan, txosna eta herriko produktuen saski zozketa jarriko du antolakuntzak bisitarien eskura.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa