Ostiralean eta atzo Arabako Suhiltzaileek CO2 neurketak egin zituzten Zabaleko Ikastetxean, gela batean eta jantokian usain arraroa zegoelako. Arabako Suhiltzaileek adierazi dute "konbustio" usaina zela, eta ez gasarena.
Berez, Guraso Elkarteak azaldu du galdaran ez dagoela matxurarik, baizik eta tximinian arrakala bat dagoela eta CO2 isurketa sortu dela hor. Hala ere, suhiltzaileek ziurtatu dute ez dagoela inolako arazorik, egindako neurketen arabera.
Dena den, kaltetutako gelako ikasleak beste leku batera mugitu dituzte eta bazkal orduan galdara itzaltzen dute, jantokian edozein isurketa ekiditeko.
Konponbidea
Amurrioko Udalak atzo bilera egin zuen Guraso Elkartearekin eta komunikatu zion bihar teknikariak ikastetxera joango direla probatzeko ea hodi batekin isurketa konpondu dezaketen.
Bitartean, Guraso Elkarteak azpimarratu du ez dela alarmarik sortu behar: "ez dago inolako arriskurik".
Gurasoek aipatu dute urrian jakinarazi ziotela egoera tokiko erakundeari, baina suhiltzaileen beharra izan arte ez dutela esku hartu. "Udalak ondo jokatu du, baina azkarrago egin behar zuen", argitu du familien bozeramaileak.
Bestalde, elkarteko kideek erantsi dute ez duela zentzu handirik lan handiak abiatzea ikastetxean, laster eraikin berria egingo baitute bertan.