Amurrioko xake taldeak udaberriko torneoa antolatuko du otsailetik ekainera bitartean. Txapelketa irekia izango da eta, beraz, edonork hartu ahalko du parte, taldeko kide izan hala ez. Antolatzaileetako batek, Jon Gerrerok, adierazi duenez, ez da ezer ordaindu beharko norgehiagokan parte hartzeko.
"Lehiaketa sistema suitzarra" erabilita jokatuko da txapelketa, xake torneoak egiteko era ohikoena, hain zuzen ere. Hortaz, partaide guztiek bost partida jokatu beharko dituzte gutxienez; bana 15 eguneko. Norgehiagoka guztiak irabaztea lortzen duen jokalariari emango zaio txapela.
Era berean, neguko xake torneoa egiten ari dira oraindik, jardunaldi bat falta da amaitzeko. Hamabost partaide daude guztira.
Taldeak hamazortzi kide ditu guztira, eta helduentzako zein gazteentzako klaseak eskaintzen ditu astero. Otsailetik ekainera, berriz, xake ikastaroa emango dute asteartero: 18:30etatik 19:30etara gazteentzako, eta 19:30etatik 21:00etara helduentzako. Ostegunetan, aldiz, Bañuetan duten egoitzara partidak jokatzera joateko gonbita luzatuko dute.
"Balorazio baikorra"
Gogoratu beharra dago taldea irailean sortu zela berriro, hainbat urte desagertuta eman ostean. Beraz, Guerrerok “balorazio baikorra” egin du hilabete hauetako ibilbideari dagokionez: “Ezer ez izatetik zerbait izatera pasatu gara”.
Etorkizunari begira, udaberriko txapelketaz eta xake ikastaroaz aparte, aldibereko partidak ere antolatuko dituzte, Amurrioko eta Bañuetako jaietan.