aiaraldea.eus

Amurrioko Alderdi Popularrak herrian dauden “kartelak, pankartak eta pintadak” salatu ditu

Erabiltzailearen aurpegia Julen Solaun Martinez   Politika  Amurrio

Oposizioko taldetik udal gobernuari egotzi diote horrelako "kartelak, pankartak eta pintadak inpunitate osoz" egin ahal izatea, eta urtero milaka euroko kostua suposatzen dutela kritikatu dute.

Amurrioko Alderdi Popularrak herrian dauden “kartelak, pankartak eta pintadak” salatu ditu
Alderdi Popularrak herrian dauden pintada, pankarta eta kartelak salatu ditu. / Aiaraldea.eus | Ikusi handiago | Argazki originala

Amurrioko Alderdi Popularrak "herriko fatxadetako, hormetako, pertsianetako eta eskaileretako” egoera salatu du, “kartelak, pankartak eta pintadak” direla eta. Alderdiko bozeramaileak, Montse Canivek, salatu du “pertsona talde txiki bat herria zikintzera dedikatzen” dela, eta nahiz eta “mundu guztiak" jakin nortzuk diren, "inpunitate osoz” margotzen dutela kritikatu du.

Era berean, alkatetzari leporatu dio horrelako “gizabidearen kontrako jokabideak" ez salatzea, nahiz eta Amurrioko biztanleei urtero “gastu handia” suposatzen dioten. “Urteko herritarren zergetako milaka euro gastatzen dira beste alde batera begiratzeagatik eta errudunak ez zigortzeagatik”, gehitu du Alderdi Popularreko ordezkariak.

Azkenik, Canivek gehitu du ez dela pintadak garbitzea edo pankartak kentzea agintzen: “Urritik daude pintada batzuk, eta oraindik ez dira kendu”. Gauzak hala, udalaren “utzikeria” nabarmena dela adierazi du Canivek.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa