.jpg)
Hainbat ekintza programatu ditu aurten Amurrioko Txirrindularitza Elkarteak bere berrogeita hamargarren urteurrena ospatzeko. Garrantzitsuena Euskal Herriko Itzuliaren bigarren etapako irteera izango da, apirilaren 7an. Hala ere, antzinako txirrindularitzaren inguruko erakusketa ere atonduko dute, Amurrioko Etxolan apirilaren 4tik 30ra.
Egingo den lehenengo ekintza kadete mailako Aiarako Biraren eta elkarteko txirrindularitza taldeen aurkezpena izango da, Amurrioko Antzokian martxoaren 13an. Ondoren, apirilaren 3an, Antzokian ere, erakusketaren eta 50. urteurrenaren bideoaren aurkezpenak egingo dira.
Lehenengo lau ekintza horiek burututa, udazkenera arte itxaron beharko da: urriaren 31n, Matias Landaburu eskolan, denboraldi amaierako bazkaria egingo da.
Txirrindulari profesionalen partaidetzarekin egingo da mahai-ingurua azaroaren 6an eta, amaitzeko, taldearen historiari buruzko liburuaren aurkezpena antolatuko da azaroaren 13an.
Urrezko Guk Saria
Horrez gain, Urrezko Guk Saria jasoko du elkarteak martxoaren 14an, bere mende erdiko ibilbidearen aitortza gisa. 19:30ean izango da ekitaldia Amurrio Antzokian.
Elkarteak egiten duen lana goraipatu du Amurrioko Udalak: "35 txirrindularik osatutako txirrindularitza eskola du, bere lau kategorietan, aurrebenjaminetan, benjaminetan, kimuetan eta haurretan, eta baita duela gutxi sortutako junior mailako talde bat ere, 5 kiderekin. Gainera, urte osoan kirol proba hauek antolatzeaz arduratzen da: Aiarako Bira, Amurrioko Sari Nagusia, San Jose Saria, lineako txirrindularitza eskolak, Aiara zirkuitua, ibilaldia alforjekin eta BTT txirrindularitza eskolak".