Dagoeneko berrogeita bat urte pasa dira eta, protagonistak azaldu bezala, “irudietan agertzen diren asko hilda daude” gaur egun. Dena den, 1979ko Amurriko jaietako giroa hilezkorra izango da Pepe Gartziaren irudiei esker. Argazkilaria afizioz, eta ez ofizioz, herriko hainbat jai eta kirol ekintzei ere argazkiak atera dizkie Gartziak hainbat hamarkadetan zehar. Dena den, gaur egun argazkilaritzatik ia erretiratuta dagoela aitortzen du, “edonork atera ahal ditu argazkiak gaur egun”.
Nahiz eta irudi hauek 70eko hamarkadakoak izan, argazki gehienak 80ko eta 90eko hamarkadetan atera zituen, eta bere lonja batean prestatutako laborategi batean errebelatzen zituen. Milaka irudi gordetzera heldu zen, baina afera polizial bat medio, horietako asko galdu zituen. Dena den, poliziak argazkiak kendu eta gero, irudi gehiago atera zituen bere alaba txikien laguntzarekin.
Argazkilaritza alorretik aparte, margolaria eta poeta ere bada amurrioarra. Berak egindako margolan abstraktuez beteta du bere gaur egungo lonja eta, nahiz eta margolan bat ere ez duela saldu aitortu, “lagungarria” dela dio. Tamaina askotariko koadroak ditu, baina helburu komunikatibo konkreturik ez dutela gehitu du ere, “nire koadro bat ikusten baduzu eta gustatzen bazaizu, bere funtzioa bete du dagoeneko”.
Poesiari dagokionez, berak editatutako liburuak ere argitaratu ditu. Inundado de silencios, adibidez, poesia eta margolanak uztartu zituen bere lehenengo lana izan zen. Bertan, marrazki abstraktuak amodioari buruzko bertsoekin konbinatzea bizan zuen Gartziak helburu.
Argazkiak: Pepe Gartzia