aiaraldea.eus

Otegi: “EAJk beti beharko du zortea irabazteko, guk behin baino ez”

Erabiltzailearen aurpegia Txabi Alvarado Bañares   Politika  Amurrio
Otegi: “EAJk beti beharko du zortea irabazteko, guk behin baino ez”

Hitzaldia eskaini zuen atzo Arnaldo Otegik Amurrio Antzokian. Ehundik gora lagun bertaratu ziren EH Bilduko koordinatzaile nagusiaren gogoeta eta galderen erantzunak entzutera.

Zaldibarko zabortegiaren gaiari heldu zion lehenbizi Otegik. Zaborraren kudeaketa publikoa izan behar dela aldarrikatu zuen politikariak, eta horren kudeaketan mugimendu ekologistak parte hartu beharko lukeela defendatu zuen, besteak beste.

Datorren apirilaren 5eko hauteskundeei begira jarri zen jarraian. Aurreratu zuenez, erabakitzeko eskubidearen aldeko gehiengoa egongo da, EH Bilduko kidearen ustetan, “baldin eta EAJ eta Podemos gehiengo horretan sartzen baditugu”. Alderdi jeltzalea garaitzea zaila izango dela aitortu zuen, hala ere "baina ez ezinezkoa". “EAJren arrakastetako bat da garaiezina denaren itxura ematen duela, baina ez dago alderdi garaiezinik. Euskal Herria EAJ baino feminista, ekologista eta sozialista edo berdinzaleagoa da. EAJk beti beharko du zortea irabazteko, guk behin baino ez”. Zentzu horretan, Otegik ziurtatu zuen EAEn gauzak aldatzeko beharrezkoa dela EH Bildu indartsu egotea.

Ildo beretik, Gemma Zabaleta, Dani Arranz, Manuel Diaz de Rabago eta Javier Madrazok EH Bilduri eskainitako atxikimendua modu positiboan baloratu zuen Otegik: “Ez dira independentistak, baina independentistak izaten amaitzea espero dut”. Zentzu horretan, subiranotasuna lehen mailako kontraesana dela azpimarratu zuen koalizio abertzaleko koordinatzaile nagusiak, eta “hemen eta dena” erabakitzearen aldeko borrokan berretsi zen.

Madrilgo gobernuari dagokionez, politikariak erantsi zuen "ate bat irekita” utzi dietela. “Gobernu hau dagoen tokian egoten lagundu dugu, eta bertan mantentzea nahi dugu, pausoak ematen badituzte”.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa