Koronabirusaren krisiak Amurrion sortuko duen kalte ekonomikoa leuntzeko asmoarekin, neurriak hartzeko eskatu diote EH Bilduk eta Orain Amurrion alkatetzari, bakoitza bere aldetik. Neurri hauek oraindik onartu gabe dauden udal aurrekontuetan sartzea espero dute bi talde politikoek.
EH Bilduk, Covid-19ak sortutako egoera konpontzea “guztion ardura” dela gehitu ostean, hiru proposamen plazaratu ditu, “ondorio ekonomikoak ahal den neurrian arinduko dituztenak”: Udal-laguntzen partida 200.000 eurotan handitzea, berariazko partida bat sortzea birusak eragindako egoerei aurre egiteko -200.000 euro inbertituta- eta saltoki txikiei, autonomoei edo tokiko ekoizleei laguntzeko partida bat sortzea, beste 200.000 eurokoa”.
Horrez gain, “hainbat proiektu aurrera ateratzeko” dirua ere eskatu dute. Landazuri Etxearena da horietako bat: 40.000 euroko zuzenketa proposatu dute Landazuriren inguruko balizko erabiltzaileen, adinekoen eta profesionalen arteko parte-hartze prozesu bat egiteko. Kultur Etxeari dagokionez, 80.000 euro gehiago bideratzea eskatu dute, “instalazioak eta altzariak hobetzeko”.
Gainera, enplegua “lehentasuna” dela adierazi dute, eta langileen kontratazioa sustatzeko zuzenketa bat ere aurkeztu dute. “Alde batetik, herriko jendea kontratatzeko aukera emango luke eta, beste aldetik, udalean dugun langile-defizita arintzeko balioko luke”, ziurtatu dute.
Orain Amurriok, bere aldetik, jakinarazi du ez duela aurtengo aurrekontuetan osoko emendakina aurkeztuko, koronabirusaren afera dela eta. Hortaz, udalak "aurreikusitako inbertsioekin jarraitu eta sortzen ari diren behar sozioekonomikoei erantzun behar diela” uste du taldeak, murrizketa ekonomikoak alde batera utzita.
Proposatu dituzten neurrien artean honako hauek daude: zerga eta tasen murrizketak, alokairua ordaindu behar duten biztanleei eta dependentzia duten pertsonei laguntzak edo komertzioei bideratutako diru-laguntzak, besteak beste.
Dena den, honako emendakin partzial hauek proposatu dituzte: Berdintasun espazio baten sorkuntza, udaleko biltegien egokitzapena (“segurtasunerako eta aktibitatearen efizientziarako urritasun nabarmenak baitituzte”), udal eszenario baten erosketa, trantsizio eta efizientzia energetikoaren inguruko ikerketa (beroketa globalari aurre egiteko neurriak zehazten laguntzeko) eta Aresketamendin energia berriztagarrien parkeari bultzada bat emateko prozesu pate hartzailea.