Igandean (apirilaren 12an) izango da Aberri Eguna. Konfinamendu egoera dela-eta, ordea, ohiko deialdi formatuak aldatu egin dira. Etxeetatik euskal nazioaren eguna ospatzeko deia luzatu dute. "12:30ean ahalik eta jende gehien nahi dugu balkoietara ateratzea ikurrinak jarrita", azaldu dute. Horretarako, aberrieguna.eus webgunean elkartasun mezuz osatutako mosaiko erraldoia egingo dute, "historiarako ikur bat".
Deitzaileen artean lurralde eta profil anitzeko herritarrak bildu dituzte, tartean, Basilio Garcia Mayo Amurrioko udaltzaina. "Parte hartu nahi nuen galdetu zidaten, eta baietz esan nuen. Hasieran beldurra eman zidan, baina azkenean ausartu eta animatu nintzen, teknologia berriekin ez naiz batere trebea eta", aitortu du aiaraldearrak, "antolakuntzatik agerian utzi nahi genuen krisialdian pertsona arruntok dugun eginbeharra". Garcia Mayorekin batera, Euskal Herriko suhiltzaile, erizain, denda langile eta beste zenbait sektoretako lagunek zabaldu dute ekimena: "Helburua Aberri Egunean euskal herritarrak lehenestea da, bertan bizi diren pertsona guztientzako Euskal Herria osatu nahi dugu".
Balkoietan 12:30ean minutu bateko isilunea eta "txoriak txori" kantatzeko proposamena egin dute, batik bat, egoera honetan hil diren guztien omenez. "Gaixotasunaren aurkako auzolan erraldoiarekiko harrotasuna eta aurrera egiteko indarra azaltzeko", azpimarratu dute deitzaileek. "Aberri egun ezberdin bat egitea da helburua", erantsi du Basilio Garcia Mayok. Jasotako mezu guztiak webgune eta sare sozialetan hedatuko dituzte.