“Etxean Koronabirusagatik” lehiaketa abiatu du Amurrioko Udalak, herritarrek berrogeialdian bizitzen ari diren esperientziak partekatzeko. Lan onenentzako Amurrioko ostalaritza establezimenduetan eta tokiko saltokietan erabiltzeko 100, 75 eta 50 euroko erosketa txartelak banatuko dira, eta Udalaren sare sozialetan eta Hauxe Daren edizio digitalean argitaratuko dira.
Hiru kategoriatan banatuko da iniziatiba: Marrazkietan, mikrokontaketa eta olerkietan eta bertsoetan. Marrazkiak 4 eta 12 tarteko haurrentzat izango dira eta “gaiarekiko egokitasuna, sormena, originaltasuna eta obraren kalitatea” baloratuko ditu, beste bi espezialitateetan bezala. Hiru adin tartetan sailkatuko dira irudiak, 4-6, 7-9 eta 10-12. Marrazki guztiak A4 tamainako folio batean egin beharko dira eta argazkia edo eskaneatutako irudia bidali beharko dira.
Mikrokontaketak eta olerkiak, berriz, 12 urtetik gorako pertsonentzako izango dira; hiru adin tartetan ere banatuko da: 12-15, 16-18 eta 18 urtetik gorakoak. Idatzitakoak euskaraz edo gaztelaniaz egin ahalko dira eta, gehienez, 100 hitzeko luzera izan beharko dute.
Bertsoak 7 urtetik gorakoentzako izango dira eta bost adin tartetan banatuko dira: 7-9, 10-12, 13-15, 16-18, eta 18tik gorakoak. Euskaraz izan beharko dira, neurri eta doinu librekoak izan ahalko dira, betiere hiru bertsoko bertso-sortak edo, audioan bidaltzekotan, bost minutuko gehienezko iraupena errespetatuta.
Egindakoak apirilaren 29ko 14:00ak baino lehen bidali beharko dira partehartzea@amurrio.eus helbidera edo, WhatsApp bidez, 605 725 240 zenbakira mezua bidalita. Ezinbestekoa izango da izen-abizenak, adina eta harremanetarako telefonoa adieraztea.