Herriko festak bereziak izango dira aurten. Hala ere, horrek ez du eskualdeko dantzarien grina geratu. "Gaur dantzaren nazioarteko eguna da, eta herriko jaietan dantzatu ezin badugu ere, #Etxeandantzan jarraitzen dugu. Hemen duzue prestatu dugun bideoetako bat!", adierazi dute sareetan Aiara Dantza taldeko kideek.
Iraia Aspuru da partaideetako bat. Aiaraldea komunikabideari azaldu dionez, Euskal Herriko zenbait talderengandik hartu dute ikus-entzunezkoa eratzeko ideia: "Dantza talde asko estilo honetako bideoak egiten hasi ziren, eta hori ikusita gu ere animatu gara. Beste dantza batzuk ere grabatu ditugu, bakoitzak bere etxean, baina apurka apurka publikatuko ditugu. Era amateurrean ari baikara bideoak grabatu eta editatzen". Elkartekoak ez ezik, "nahi duen oro" animatu dute etxean bideoak grabatu eta sare sozialak dantzaz betetzera, #etxeandantzan traola erabilita.
Konfinamenduaren aurrean, berregokitzapena
Eskolak itxi bezain pronto erabaki zuten klaseak bertan behera uztea Amurrioko Reforreko egoitzan. "Lehenengo astean ikasleei hainbat dantzen kantak bidali genizkien, etxean praktikatu zezaten. Bestalde, ikasleek eskatuta, talderen bat online klaseak egiten ari da, mantentzeko gehien bat". Zailtasunak ere izan dituzte, aitortu duenez: euskal dantzetako asko taldean egitekoak dira, "eta pausuak, malgutasuna eta indarra etxean landu daitezkeen arren, oso zaila da erreferentziarik gabe dantzatzea, zinta dantza bat esaterako. Eta dantza berriak ikasteko zeresanik ez!".
Urteko plangintzan aldaketak
Egutegian markatuta izan ohi dituzte apirila eta maiatzeko zenbait data, Aiaran, Tolosan, Orozkon edota Laudion emanaldiak eskaintzen dituztelako. "Ziurrenik dena bertan behera geratuko da, eta geratzen ez bada ere, oso zaila izango da urteroko dantzaldi ikusgarria prestatzea entsegurik gabe".
Bestalde, maiatzean antolatzen dute urtero Euskal jaia, baina aurtengo eguna alboratu behar izan dute. Zehazki, hilaren 30ean zuten hitzordua aurreikusia, "eta jarraian Araba Euskaraz, Araba Euskaraz aurreko jaia, Arabako dantzari eguna eta abar genituen". Hala ere, ez dute itxaropena galdu: "Bien bitartean, jarraitu dantzan, dantzatzen duen herria ez da inoiz hilko eta".