Oinez edo bizikletaz paseatzeko bide eta paisaia lasaiak uztartzen ditu Arrastariako itzuliak. Tertangatik, Delikatik edo Urduñatik hasi daiteke bidea; finean, bakoitzak gogokoen duen puntutik. Gainera, freskatzeko guneak ere badaude tartean, Delikako edo Tertangako erreka kasu.
Trenez edo autoz hurbildu nahi duenari pautak errazteko, Urduñan hasiko dugu ibilbidea. Rondina industriaguneko lakua izango da lehenbiziko geltokia, Txarlazo mendiaren oinpeko urmaela. Lakuaren aldameneko biribilgunetik gorantza doan errepidea hartuta, Tertangako baserrien artera helduko da ibiltaria. Bolatokira heldu aurretik ezkerrako bidea hartuta, zelai txiki batean errota eta erreka topatuko ditu bidaideak. Tertangako bide nagusira itzulita, eliza atzean utzi, eta Urduñako mendatera doan errepidera ailegatzen da. Handik aurrera doan pista jarraituta, Delikaraino iritsi daiteke. Nahi izanez gero, Infernua tabernan atseden hartzeko landa paregabea dago. Oinez edo bizikletaz ibiltzea bada asmoa, ordea, Delikako errepidea jarraituta Urduñara edo Artomañanara joateko bidearekin egiten da topo.
Artomañanatik Urduñara partzelen arteko pistak ere badaude, eta edozein hartuta Bizkaiko hirira hurbil daiteke, galbiderik gabe gainera. Ibilbidea luzatu nahi izanez gero, Urduñarantz gerturatzean, erreka ertzetik Arbieto auzora jo daiteke; berariaz egokitutako harrizko bidetik edota ibaitik paraleloki doazen pistetatik. Izan ere, mokadurako mahai eta komunekin egokitutako espazioa dago bertan.
Zailtasun mailari dagokionez, bide errazak dira, bakoitzaren gogo eta indarraren arabera luzatu edo laburtzeko modukoak. Saratxoren faltan, beraz, Arrastaria osoari bira emango genioke, bidezidor ezezagun bezain ederren artean.