ERREPORTAJEA

6-7 urteko haurrak, igandero futbol bidez euskara praktikatzen

Gaizka Garitanorekin egin zuten entrenamenduetako bat. / Etorkizuna

Konfinamendu garaiak harrapatu arte, igandero aritu dira futbolean "euskaraz entrenatzen" Amurrioko gazteak. 

Nola zabaldu euskara kirol esparruan? Galdera horri erantzun nahian sortu zuen Amurrioko Udalak futbol eskola duela 3 urte, Etorkizuna taldearekin batera. Hala, igandero elkartzen dira Reforren 80 bat lagun bi taldetan. Iñigo Fraile arduratzen da egitasmoa koordinatzeaz: "Sei entrenatzaile ditugu bi taldetan". 6 urtekoan 30 bat ume daude, "eta 7 urtekoetan 55-60". 

Futbolaren bidez euskara eskola girotik ateratzea dute helburu, "lau paretetatik kanpo ateratzea". Hala, jolasaren bidez hizkuntzaren erabileran eragitea bilatzen dute, horretarako herriko entrenatzaileak trebatuta: "Prestakuntzarako lau saio jasotzen ditugu, futboleko hiztegi teknikoa ikasteko, edota partaideen motibazioa areagotzeko baliabideak eskuratzeko". Fraileren esanetan, Etorkizuna taldekoek prestatzen dituzte kirol saioak, eta udalak euskaratzen ditu fitxak. 

Hirugarren urtea dute aurtengoa. 6 urtekoei bideratutako jarduera gisa abiatu zen egitasmoa, baina adina  luzatzea erabaki dute aurten, jarraipena beharrezkoa dela iritzita. "Umeekin batera jolas giroan euskararen praktika luzatzen saiatzen gara", dio ekimenaren koordinatzaileak. 

Amurriokoa da "euskaraz entrenatzen" trebatzeko bailarako dinamika bakarra. Dena den, Araban badira mota honetako foro gehiago. Iaz, esaterako, Agurainen elkartu ziren 200 bat gazte futbol partidak euskaraz jokatzeko helburuarekin. "Aurten errepikatzea da asmoa", erantsi du amurrioarrak. 

Araban horrelako 25 talde daude

Pozez gogoratzen du denboraldi amaierako topaketa Iñigo Frailek. Izan ere, 25 talde elkartu ziren guztira: "Futbolarekin batera euskara eta gauza gehiago lantzea da gure helburua, jolastea". 

Formula magikorik ez badu ere, gakoa zein den garbi du, "futbolak gazteen artean arrakasta handia duenez, euskararen alde erabiltzea".

Frailek nabarmendu duenez, belaunaldi berriek erreferenteak behar dituzte. Izan ere, astean behin baino gehiagotan hartzen dute parte kirol jardueretan gazteek, eta entrenatzaileek saioen gidaritza duten heinean, eredu izan behar dute. Alegia, erdaraz mintzatuz gero, kirol espazio edo jarduera hori euskararena ez dela ulertzen dute haurrek. Etorkizuneko erronkez galdetuta, beste kiroletan ere mota honetako dinamikak sustatzea ezinbestekoa dela dio Frailek. "Amurrion, aurten, ekimena 7 urtekoen artera zabaltzea lortu dugu, adibidez. Esperientzia ondo ateratzen bada, 8 urte betetzean jarraipena izatea litzateke egokiena", aurreratu du. Horregatik, mota honetako ekimenetan parte hartzera animatu ditu herritarrak: "Nik ez neukan Etorkizuna taldearekin loturarik. Proiektuaren lehenbiziko urtean proposatu zidan udalak euskara sustatzaile gisa aritzeko. Egitasmoaren nondik norakoak azaldu zizkidaten eta baiezkoa eman nuen". 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide