Larunbatean 03:00etan abiatuko da Iñaki Llano txirrindularia Amurriotik. Bilboraino joko du eta Donostiara joango da kostaldetik, gero Altsasuko bidea hartu, eta handik Gasteiz izango da hurrengo helmuga Amurriora itzultzeko. Dena 20 ordutan egitea da bere asmoa. "Idealena 17:00etan edo 19:00etan heltzea izango litzateke", azaldu dio Aiaraldea Hedabideari.
2000 euro bildu ditu Iñaki Llanok erronkaren bidez, eta AEFAT elkartera bideratuko ditu
Elkartasun erronka izango da larunbatekoa. Izan ere, eskuratutako dirua AEFAT elkarteari emango dio Llanok, Ataxia-telangiektasia gaixotasuna ikertzeko. Horretarako www.migranodera.org webgunean crowfundinga sortu zuen, eta ibilbideko kilometro bakoitza 5 eurotan saldu zuen, guztiek eroslea topatu arte.
400 kilometro izan dira eta, ondorioz, 2000 euroko ekarpena egingo dio AEFATi.
Printzipioz, Iñaki Llanok egingo du bakarrik bide osoa, baina zenbait lagun batuko dira tarte batzuetan; adibidez, gaixotasun hori duten bi umeren Amurrioko aita bat.
Halaber, auto bat joango da txirrindulariarekin laguntzeko, eta edaria edo janaria zein arropa garbia eramango dizkio.
LLanoren asmoa da ahalik eta gutxien gelditzea: "10 minutuko atsedenaldia hartuko dut Donostian, zerbait solidoa jateko, baina ez gehiago".
Barrerillan marka
Alberto Contador txirrindulariak modan jarri zuen duela gutxi beste erronka bat; Everestinga. Horretarako 78 aldiz igo zuen 1.700 metroko aldapa bera.
Everesting erronka egin zuen uztailaren 25ean Llanok Barrerillara 30 aldiz igota
Lagun batzuekin hitz egiten zuen bitartean, batek adierazi zion Everesteko altuera bera zirela Barrerillara 28 igoera. "Nik esan nion 28 egiteko, nahiago nuela 30 egitea" oroitu du Llanok.
Uztailaren 25ean ekin zion bideari txirrindulariak, eta 15 ordu eta erdi behar izan zituen horretarako: "Goizean jendea egon zen nirekin eta ondo egin nuen, baina eguerdian tenperatura 38 gradura heldu zen, eta bakarrik geratu nintzen. Une txarra bizi izan nuen 19. igoeran. Nire buruari hasi nintzen galdetzen zer egiten nuen hor, erokeria iruditu zitzaidan, baina ondo egiten ari nintzen eta jarraitu egin nuen bukatu arte".
Ultrafondo lasterketa
Kirolariaren hasierako helburua pandemia agertu arte, Espainiako Ultrafondo Lasterketan parte hartzea zen: "24 orduz zirkuituan bueltak ematea suposatzen du horrek. Prestatzeko ordu pilo eman ditut bizikleta gainean entrenatzen, prestatzaile batekin. Horrela lortzen duzu eustea proba osoari. Psikologikoki ere landu behar da, uneren batean gorputzak amore eman nahi baitu".
Iñaki Llanok azpimarratu duenez, lanketa psikologikoa funtsezkoa da horrelako erronketan: "Fisikoki prestatzea ezinbestekoa da, baina ez dagoenez denbora mugarik, ez da hain garrantzitsua. Hala eta guztiz ere, ordu asko dira txirrindula gainean, buruak une kritikoak sortzen ditu eta gainditu behar dira". Ondo baino hobeto daki hori Llanok, SC Llodianako entrenatzailea baita.