15 ordu, 46 minutu eta 8 segundo behar izan zituen Iñaki Llano txirrindulariak larunbatean, iragarritako ibilbidea betetzeko, 400 kilometro baino gehiago guztira.
Probak elkartasun helburua zuen, eta eskuratutako dirua Ataxia Telangiectasia gaixotasuna duten pertsonak laguntzera bideratu zuen. Zehazki, kilometro bakoitzeko 5 euro lortu zituen AEFAT elkartearentzat.
Gauzak horrela, gaueko 03:00etan abiatu zen Llano Amurriotik, auto batek lagunduta. Handik Bilbora jo zuen, eta Bizkaiko hiriburutik Plentziara joan zen, euskal kostaldea jarraiki Zarautzeraino, gero Usurbilgo bidea hartzeko.
Llanok azaldu du une gogorrak bizi izan zituela Beasainen: "N-1 errepidea hartu behar da eta kilometro horiek oso zailak dira txirrindulariarentzat, auto ugari baitaude. Azkenean ordubete galdu genuen zati horretan".
Edonola ere, zailtasun horiek gaindituta, bere helburuari ekin zion, aitortu duenez, Zegaman lagun batzuk zituen itxaroten berarekin Gasteizeraino joateko.
Jende gehiago batu zen egitasmora, hala ere. Ataxia Telangiectasia dituzten semeen gurasoak -Kepa Vallejo amurrioarra, adibidez- elkartu ziren Agurainen. Horrez gain, Langraitzen Team Yurrebasoko taldekideek ere bat egin zuten Llanorekin.
Azkenik, Urduñan zein Amurrion SC Llodianako eskolako txirrindulariek osatu zuten pelotoia. Horrela, ia 16 orduren ondoren, Iñaki Llano Amurrioko Juan Urrutia plazara heldu zen, familia eta adiskideak itxaroten ari zirelarik.
Ofizialki han amaitu zen lasterketa, baina oraindik bizikleta beste behin hartu behar izan zuen: "Semeek esan zidaten txirrindula gainean heldu behar nintzela etxera, eta, ondorioz, beste bi kilometro gehiago egin nituen".
Kirolariak aipatu du ondo dagoela, "gaur bertan umeak ikastetxean utzi ondoren, pare bat orduz entrenatuko dut". Hala ere, probak une gogorrak izan zituen: "kilometro askotan haizea izan nuen kontra eta indarren aldetik nahiko makal iritsi nintzen Urduñara".