Araba Euskaraz 2020

Durangoko Azokatik Amurriora mugituko da Ahotsenea

Gaur egin dute ekimena aurkezteko prentsaurrekoa. / Ahotsenea eta Saioa Gauilunak

Kultur sortzaileak Durangoko Azokatik Euskal Herriko plazetara gerturatuko ditu Ahotseneak, Amurriora tartean. Urriaren 18an izango da eskualdeko emanaldia, Aresketa Ikastolak antolatutako Araba Euskaraz ekimenaren barruan.

"Euskara jalgi hadi plazara", hala dio euskal kantu zaharrak. Helburu hori dute sortzaileek ere, bakoitzaren alea partekatzeko aukera izatea.

Durangoko Azoka izaten da udazkeneko plaza nagusia, baina koronabirusak eragindako pandemiaren ondorioz, kultura ekosistema ere egokitu behar izan da garai berrietara. Ondorioz, Ahotsenea gunea Euskal Herriko lau plazetara hedatu dute, Amurriora, besteak beste.

Gainera, Araba Euskaraz izango du adar. Hain zuzen, urriaren 18an 8 euskal talderen lanak ezagutzeko aukera eskainiko dute Amurrion, Darabagu dinamikaren barruan.

Modu horretan nahi diote eman amaiera aurtengo ikastolen aldeko festari. Alabaina, oraindik ez dute egitaraua zehaztu. "Sortzaileei luzatu zaie gonbita, eta prozedura Ahotseneak egingo du, oraindik ez dakigu nortzuk etorriko diren", adierazi du Eneko Alday Araba Euskarazeko kideak.

Amurrrioarrak aurreratu duenez, formatua txikitu dute; eta Ahotseneak dena Durangoko Azokan 4 egunetan egin beharrean 40 bat talde bilduko ditu lau tokitan. 

Amurrio, kultura ekosistemaren gune babestu izateagatik aukeratu dute. Izan ere, Aresketa Ikastolaren aurtengo helburuetako bat sortzaileei plazak eskaintzea izan da.

Hargatik antolatu zituzten emakume sortzaileen erakusketa, artearena edota Bazen behin Darabagun ekimenak, "euskal sorkuntza ezagutarazi eta hauspotzeko".

Aldayren hitzetan, lehendik ere Ahotsenearekin finkatua zuten lekua edo plaza ematea: "Urtero euskal kulturak abenduan du udaberria, baina ekainean ere egin nahi genuen. Salbuespen egoeragatik atzeratu behar izan zen jaia, baina gure konpromisoa berdina da Ahotsenearekin zein euskal sortzaileekin".

Horrenbestez, 2020ko sortzaileen lanak taularatuko dituzte urriaren 18an, Amurrion. Gaur eskaini dute prentsaurrekoa ekimena aurkezteko, Bilboko Bira kulturgunean. 

Gauzak hala, eraberritua dator Ahotsenea proiektua. Batetik, Durangoko Azokaren barruko emanaldiak Plateruena antzokian izango dira. Literaturaren uzta, berriz, Zarautzeko Literaturia jaialdian bilduko dute. "Galdakaon ere izango dira literatura eta musika taldeak euren lanak aurkezten", erantsi du Eneko Aldayk, "Amurriokoa musikari lotutakoa izango da". 

Ildo beretik, hizkuntza sustatzea izango da xedea: "Haur eta gazteei euskal kultura eta musika hurbildu nahi dizkiegu". Aldayren iritziz, euskaraz sortzeko eta gozatzeko proposamenak eta prozesuak plazaratu nahi dituzte. "Taldeak nola sortu edo antolatzen diren ere erakutsi nahi diogu jendeari. Finean, euskal musikaren industria edo artisautza gerturatu nahi dugu. Hori izango da Araba Euskarazen ekitaldi xumetxoa".

Nolabait esateko, zikloa itxi nahi dute horrela: "Urtean zehar laguntzen egondako jendeari eskerrak eman nahi dizkiogu. Bide batez, hurrengo Araba Euskaraz jaiari keinua egingo diogu bailara ikuspegitik".

8 solasaldi eta 35 zuzeneko

Gotzon Barandiaran Ahotseneako kidearen hitzetan, "8 solasaldi eta 35 bat zuzeneko" antolatuko dituzte datozen hilabeteetan, "horrek esan gura du nahiz eta aurten disko eta liburu gutxiago argitaratzea aurreikusi, idazle eta musikari lar geratuko direla euren lan berriak aurkezteko aukera barik". 

Zortzi euskal taldek joko dute Amurrion urriaren 18an, aurtengo Araba Euskaraz jaiari amaiera emateko

Gabezia horri erantzuteko erdietsi dute ahalik eta euskal sortzaile gehienei eskaintzea euren sormen lan berriak erakusteko plazak, eta ahal beste herritarrengana iristea lan horien berri.

Irailaren 25etik 27ra Literaturia ospatuko dute Zarautzen,  eta urriaren 18an Amurrioren txanda izango da: "Araba Euskaraz jaia bere osotasunean bertan behera utzi badute ere, Ahotseneakookin pandemiaren aurretik adostutako ekitaldia mantenduko dute. 8 musika taldek izango dute aukera euren lan berriak zuzenean aurkezteko".

Galdakaon, berriz, azaroaren 2tik 8ra "Sormene" jaialdia antolatuko dute, Ahotseneako zuzenekoak eta solasaldiak ardatz: "Plaza berria estreinatuko du aurten euskal kulturgintzak Galdakaon. Iaz arte liburu azoka izandakoa euskal kulturaren plaza bilakatuko da kultur adierazpide guztiak aintzat hartuta".

Aiaraldea Komunikabidea ekimenaren babesle izango da. Orain arte gisa, beraz, egitasmoaren jarraipen berezia egingo du Aiaraldea.eus atarian. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide