JESUS MARIA PLATON

"Mugendo eskolak online eman ditugu konfinamenduan eta asko eskertu du jendeak"

Izar Mendiguren Cosgaya 2020ko ira. 22a, 07:19
Mugendoko eskolako talde bat. / J.M Platon

Lehiaketarik gabe, baina ilusio berarekin hasi dituzte Mugendo eskolak Amurrion. Aurtengo ziurgabetasunaren aurrean, gogotsu ekin diote denboraldiari, Jesus Maria Platonen hitzetan.

Amurrioko Mugendo Eskolak ikasturte berria abiatu du: "Entrenamenduak hasi ditugu segurtasun neurri guztiak kontuan hartuta: gela, termometroa, distantzia, kontaktu eza.... maximoen muturrera eraman dugu dena". Jesus Maria Platon arduradunaren hitzak dira. Pandemiak euren jarduna zenbateraino baldintzatu duen galdetuta, "egoera zaila da, baina egokitu beharra dago" dio.

Eskolaz Kanpoko ekintzak eten dituztenez ikastetxeek -Eskola kirola ere bai- aukerak handitu zaizkie. "Nahi duena probatzera animatzen dugu, 945 39 32 14 telefono zenbakira deituta edo meyiro@mugendoeuskadi.com postara idatzita". Ahalik eta ondoen entrenatzea izango da aurtengo xedea. 

Haurren klaseetan, gainera, garapen fisiko eta emozionala lantzeari ekingo diote, aurreratu duenez. Helduen jardunetik giro segurua azpimarratu du, "Mugendo Kickboxingak daraman metodologiaz gain".

Online klaseak

Pandemia hasi zenean ekin zioten Interneteko klaseei, martxoaren 14an. "Astelehenetik igandera goizez, eguerdiz eta gauez ematen ditugu klaseak. Alde teknikoa, zati fisikoa, familientzako luzaketak… eskaini ditugu. Baita asmakizun eta eskulanak ere, alde ludikoa eta teknikoa uztartuta", kontatu du amurrioarrak. "Familia berriak batu dira horrela, eta munduko jende gehiagorekin konektatzeko aukera eman digu", azpimarratu du. Platonen esanetan, jendeak asko eskertu du konfinamenduan ikus-entzunezko baliabideak eskaintzea: "Lan handia egin dugu, egunero gabiltza berregokitu nahian, baina gure ikasle eta familien aurpegia ikusita aski zaigu".

Zuzeneko entrenamenduak eta grabatutakoak sareratu dituzte, "horrela ondoren edo beranduago ere egongo da materiala eskura. Hemen jarraitzen dugu, berrikuntza teknologikoekin barne". Hargatik, pozik dago eskolako arduraduna: "Eskolan gehienok jarraitzen dugu. Bada berrartzeko gogoa duen jendea. Amurrion aurreko urteetakoa bezalako jende kopurua mantendu dugu". Dena den, arduraz jokatzeko konpromisoa berretsi du: "Ziurgabetasuna nagusi bada ere, gauzak ondo egitea dagokigu. Arduraz jokatzeko garaia da".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide