Asteburuak emaitza onak utzi ditu Aiaraldeko txirrindulariei dagokienean. Julen Latorre Gulias Valladoliden lehiatu zen Espainiako Txapelketan, eta laugarren helmugaratu zen. "Arkaitz Vitorica eta Kross Racing Team eskertu behar ditut asteburu osoan zehar jasotako babesagatik", adierazi du gazteak sare sozialetan.
Aiararrak, Palentzian
Aiarako Txirrindulari Taldekoak, berriz, Palentziaraino joan ziren. "Ez dugu oraingoan zortea alde izan", azaldu dute. Izan ere, lau txirrindularik hartu zuten parte, baina ezusteko ugari izan zituzten: "Iker erori egin zen (kalte larririk gabe) eta Gabrielek gurpila zulatu zuen lasterketa buruan zihoala". Alabaina, taldeko kotxeak ezin izan zituen gazteak lagundu: "Lasterketa apurtua zegoen. Gure autoa laugarren pelotoiaren atzean zihoan huts teknikoa jakinarazi zigutenean". Ondorioz, txirrindulariengana iritsi zirenerako aukera guztiak galduta zituzten, azaldu dutenez.
Igandean, berriz, Lizarran izan ziren. Gabrielek seigarren helmugaratzea lortu zuen bertan, sprintean borrokatu ostean. Taldeak nabarmendu duenez, denboraldi osoa darama gazteak garaipenaren atarian, podiumik zapaldu ez badu ere. Aiarako taldeak Gaizka Garay artziniegarraren lasterketa goraipatu du, halaber, "lehen urtea du eta uneoro egon da onenen taldean". Horrenbestez, ikasten jarraitzeko asmoa dutela berretsi dute.