Otsemeak talde feministak 5 urte bete ditu eta, zailtasunak zailtasun, zenbait ekintza antolatu ditu hori ospatzeko. Hala adierazi du taldeak: "5. urteurrenaren bueltan hainbat ekintza antolatuko ditugu urria eta azaroan asteburutan, egun bakarreko egitarau osoa antolatu beharrean; tailerrak, kontzertuak... Helburua da 5 urte luze bezain polit hauek feminista guztiekin ospatzea".
Berez, lehenengo jarduera biharkoa izango da. 22:00etan Akelarrea abiatuko dute San Anton plazan eta segurtasun eta prebentzio neurriak jarraiki, publikoa aulkietan eseri beharko da, segurtasun distantzia mantenduta.
Musika eta dantza
Otsemeak taldearentzat ez da estreinako aldia Akelarrei dagokienez. Izan ere, udako solstizioak ospatzeko bat baino gehiago antolatu dute azken urteotan. Hori bai, aurten musika zuzenean gehitu diote euskal dantzei, dantza modernoari eta testuen irakurketari. Aurreko hitzorduetan bezala, biharko saioa izango da egingo duten emanaldi bakarra.
Udaberritik lanean
Ikuskizuna udan plazaratzea zen taldearen asmoa: "Maiatzean hasi ginen guztia prestatzen, nahiz eta ekainaren 23rako spot moduko bat atera genuen. Asmoa jaietan egitea zen, baina egoerak ez digunez utzi -jaietako datetan zeuden ekintza guztiak bertan behera utzi zirelako- geldialdia izan genuen entseguekin. Irailaren amaieran hasi ginen berriz biltzen eta guztia prestatzen".
Irudi berria
Otsemeakek berritasun gehiago ekarriko ditu hurrengo asteetan: "Urteurrena aitzakiatzat harturik, merchandising berria aterako dugu logo berriarrekin batera".