Aldi Baterako Enplegu Erregulazioko Espediente berria aurkeztu du Tubos Reunidoseko zuzendaritzak. Espediente berri horren eragina %66koa izango litzateke eta zortzi hilabete iraungo luke, LABek salatu duenez.
Sindikatuaren arabera, “zentzugabekeria” da planteatutakoa, “zuzendaritzak 2020 eta 2021erako bideragarritasun plana aurkeztea aurreikusita duenean 2020a amaitu aurretik”.
Gauzak hala, sindikatuak uste du ezin dela horrelako espediente bat onartu, langileei azalduko dieten etorkizunerako proiektua oraindik plazaratu gabe dagoelako.
“Kokoteraino”
LAB sindikatuak nabarmendu du langileak “kokoteraino” daudela zuzendaritzak ABEEEak “malgutasunerako tresna moduan” erabiltzeaz.
“Kokoteraino gaude enplegu suntsiketaz eta eros-ahalmenaren galeraz, ABEEEak gehiegi baliatzeagatik sortutakoak, eta kokoteraino gaude, baita, 2017tik hona gure lan-baldintzak hobetu eta soldatak hobetzearen inguruan negoziatzeari ematen dioten ezezkoaz”.
Zuzendaritzaren soldatak
Gainera, sindikatuak nabarmendu du Tubos Reunidos talde zuzendaritza-batzordeko kideek euren soldatak bikoiztu dituztela azken urteetan, “enpresaren egungo antolakuntza kaosaren erantzuleak” diren arren.
“Guzti horrengatik, ABEEE hau bertan behera uztea eta enpresa bizi duen noraezatik ateratzea ahalbidetuko duen bideragarritasun plana exijitzen dugu”.