Josune Irabien amurrioarrak alkatetza utzi du Eusko Jaurlaritzara batzeko. Amurrion hiru udal hauteskunde irabazi ostean, Eusko Jaurlaritzako Toki Administrazioekiko Harremanetarako eta Administrazio Erregistroetako zuzendari izango da. Horrela, Olatz Garamendi Gobernantza Publiko eta autogobernuko sailburua buru duen saileko kide moduan arituko da.
Azken 6 urteetan hainbat aldiz kokatu dute zurrumurruek Irabien Eusko Jaurlaritzan. Orain arte, ordea, ez da hori gertatu. Pasa den astean agurtu zituen udal langileak alkate ohiak eta laster ekingo dio lan berriari.
Josune Irabienek ibilbide politiko luzea egin du aurretik: 2007an Arabako Batzar Nagusietan ordezkari izendatu zuten eta Aiarako Kuadrillako kide bezala ere aritu zen. Horrez gain, EAJko zerrendetan parte hartu du, besteak beste, 2016ko Legebiltzarreko Hauteskundeetan. 2011n bilakatu zen Amurriok izandako lehen alkate emakumezkoa.
Alkate berria
Irabienek uko egin ostean, lekua utzi dio Txerra Molinuevori, bi legealdiz alkateordea izan denari, hain zuzen.
EAJk oharra plazaratu du Irabienek eginiko ibilbidea goraipatzeko eta bere etapa berrian zorte ona opatzeko: "EAJ-PNV Amurriotik eskerrak eman nahi dizkiogu, bihotzez, Josune Irabieni, urte hauetan guztietan herriko erakundearen buru gisa egindako lanagatik, eta zorte onena opa nahi diogu. Izan ere, bere lanarekin eta dedikazioarekin, etapa profesional berri eta ilusionagarri honetan, ziur gaude euskal herritarroi, oro har, eta, bereziki, euskaldunoi, gure ongizatea eta bizi-kalitatea hobetzen laguntzen jarraituko digula".