Pasa den igande arratsaldean Amurrio Trail Taldeak bi metro eta erdiko kartoi zurruneko Olentzeroa jarri zuen Kuskumendiko txondorran, nahi duenak aukera izan dezan pertsonaia bisitatzeko eta bere gutuna postontzian sartzeko.
Aurten pandemiagatik ezingo dira Babioko igoera eta 16 orduko non-stopeko elkartasun ekintzak egin. Horregatik egingo dute ekimen alternatibo hau.
"Argazkiak atera Olentzerorekin, eta bidaliguzue amurriotrail@gmail.com posta elektronikora, eta hona igoko ditugu argazkiak", azaldu dute trail taldeko kideek, "guztien artean zozketa bat egingo dugu eta abenduak 24an olentzerok emango dizkie opariak irabazleei".
Argazkiak igotzen dituzten guztiek baimena emango diote Amurriotrailrunning mendi klubari irudiak sare sozialetara igotzeko, lehiaketaren oinarrietan zehaztu dutenez.
Baimena eskatzea
Hala eta guztiz ere, aintzat hartu beharra dago Amurrioko Udalak gomendatu duela ez igotzea Kuskumendira, hango teilatua konpondu behar baita.
Halaber, Amurrio Trail Taldeak gogoratu du autoz igotzea debekatuta dagoela, eta hori egiteko beharrezkoa dela Amurrioko Turismo Bulegoan baimena eskuratzea.