Urtarrilaren 7an zabalduko ditu ateak Amurrioko Bañueta Kiroldegiak. Irekieraren lehenengo fase honetan igerilekura eta gimnasiora sartu ahalko dira herritarrak eta urtarrilak aurrera egin ahala berrartuko dituzte gainerako jarduera gidatuak. Udalak hurrengo egunetan jakinaraziko du kiroldegira joateko aurretiko hitzordua eskatzeko prozedura eta bertan jarduteko indarrean egongo den segurtasun protokoloa.
Martxoan itxi zituzten Bañueta Kiroldegiko ateak. Udalak jakinarazi du 2020 martxoko kuota ordaindu zutenek ez dutela urtarrilekoa ordaindu beharko. Bien bitartean, bajen eta alten kudeaketarako prozedura abiatu dute. Herritarrek abenduaren 9tik 30era izango dute baja eskatu eta martxoko kuota berreskuratzeko epea. Hiru bide jarri dituzte horretarako: Kiroldegian aurrez aurre 17.00etatik 20:30etara, telefono bidez 945393642 telefonora deituta edota e-mail bidez banuetakiroldegia@gmail.com edo itzulketak.banuetakiroldegia@gmail.com helbideetara mezua bidaliz.
Kirola egiten hasi nahi dutenek ere bide berdinak jarraitu ahalko dituzte kiroldegian izena emateko.