Amurrio Trail Taldeak jasoko du Urrezko Guk saria aurten. Martxoaren 13an egingo dute aitortza egiteko ekitaldia, Amurrio Antzokian. Udalak nabarmendu du erabakia “adostasunez” hartu dela. Tokiko erakundeak zehaztu duenez, bi arrazoi nagusirengatik jasoko du taldeak saria: kirol munduan egiten duen lanagatik eta burutu dituen elkartasun ekimenengatik, konfinamendu garaian etxez etxeko laguntza sarea bultzatu zuelako taldeak.
“Kirol arloan, Amurrio Trail Taldeak 8 urte baino gehiago daramatza batez beste 400 izen-emate jasotzen dituen Amurrio Trail Lasterketa antolatzen”, azpimarratu du udalak. “Euskadiko lehiaketen barruan lekua egitea lortu du. Batzuetan Euskal Herriko trail txapelketetarako baliozkoa izan da”.
Euskal Mendizaletasunaren Gala ere prestatu zuen iaz taldeak, pandemiaren aurretik Antzokian ospatu zena.
Horrez gain, urtero Gabonen testuinguruan antolatutako Babioko igoera eta Babio Non-Stop ekimen solidarioa ere aipatu ditu udalak, trail taldeak egiten dituen jardueren beste bi adibide gisa. “Ezohiko Gabon jai hauetan ere Olentzeroren laguntzaile leialak izan dira, eta mendira igotzea bultzatu dute, ikazkinaren kartoizko irudiarekin argazkia ateratzeko, eta Amurrioko umeek nahi zutena jasotzen zuen karta bertan uzteko”.