"Ez dugu egutegirik egin, ezin gara hemendik atera, eta ez dugu uste elur estazioetara bertaratzerik izango dugunik". Amurrioko Elur taldeko Jon Aspururen hitzak dira, COVID-19 pandemiak euren jarduna bete-betean mugatu du eta.
Iazko txangoak ere eten zizkien osasun eta krisi ekonomikoa eragin duen gaitzak: "Denboraldia erdian moztu zitzaigun, eta aurten ezin izan dugu ezer egin. Egoera nahiko larria da".
Ohikoan, abendutik martxoa edo apirila arte antolatzen dituzte eski estazioetara irteerak. "Aktibitate gabe gaude", ohartarazi du ordezkariak.
Elkartea kolokan
Osasun krisiak ez ezik, egoera ekonomikoak ere baldintzatu du Elur taldearen geroa. Izan ere, diru-laguntza nabarmen txikitu zaie. Aspururen hitzetan, duela zenbait urte Amurrioko Udalaren aldetik 3.000€ jasotzen zituzten, baina 2007an, krisi ekonomikoagatik, 1.000 eurora jaitsi zuen tokiko erakundeak partida. "Ulertzen dugu murrizketetan gu izatea lehenengoak, baina 2019an 700€ eman zizkiguten, eta iaz 300€. Haserre gaude udalarekin", azpimarratu du.
Hori dela eta, zalantzan dute elkartearen etorkizuna: "Aurten dudan gaude diru-laguntzak aurkeztu edo ez. Teknikariaren erantzunaren arabera baloratuko dugu elkartea Amurrion mantendu edo ez".