Greba egin zuten atzo Haurreskolak Partzuergoko langileek, LAB, ELA eta STEILAS sindikatuek deituta. Azken hilabeteetako mobilizazio eta grebei segida emanez, bost aldarrikapen nagusirekin atera ziren kalera: indarrean dauden akordioak betetzea, lan hitzarmen berria negoziatzea, langileak egonkortzea, zerbitzuaren doakotasuna bermatzea eta Hezkuntza Sailean integratzea.
Amurrion elkarretaratzea egin zuten langileek, Juan Urrutia plazan, arratsaldeko 17:30ean. Haurreskoletako gurasoen babesa ere izan zuten mobilizazioan. Goizean Gasteizen burutu zuten eguneko mobilizazio nagusia, Eusko Jaurlaritzaren Lakuako bulegoen aurrean.
Jarraipen zabala
Gehiegizko zerbitzu minimoak eta greba desitxuratzeko ahaleginak salatu dituzte sindikatuek. Halaber, atzoko mobilizazio egunaren oso balorazio positiboa egin dute, langileen %70ak bat egin baitzuen grebarekin.
"Langileei eta jendarteari argi adierazi nahi diegu egoeraren larritasuna eta mobilizazio dinamikarekin jarraitzeko beharra", adierazi zuten Amurrioko elkarretaratzean, "gaurko laugarren greba egun honetan oraindik ez dugu egoerari erantzungo dion mahai negoziatzailerako deirik jaso". Hezkuntza Sailak jarrera aldatu ezean, greba egun gehiago iragarri dituzte datozen asteetarako. Zehazki, otsailaren 22, 23 eta 24an izango dira hurrengo ekimenak.