Atzo -urtarrilak 29- egin zuten urteko lehenengo Udal Osoko Bilkura Amurrioko Udaletxean. Orain Amurrio udal taldeak oharra plazaratu du Gizarte Zerbitzuen alorrean hartutako zenbait erabakien gainean duen iritzia azaltzeko.
Opozisioko taldeak azaldu duenez, 2016ko abenduan berrikusi eta onartutako Gizarte Zerbitzuei buruzko 12/2008 legean Gizarte Zerbitzuen gaineko zenbait eskumen aitortzen zitzaizkien udalei. Lege honen onarpenaren ostean, Arabako Foru Aldundiak 24 hilabetez alorra kudeatuko zuen, zerbitzuak nola finantzatu aztertu bitartean. Urtez urte, ordea, luzatu egin da epe hori eta horrela egin zen ere atzo egindako osoko bilkuran; eskumenen lortzea 2021eko abendura arte atzeratuz.
"Horrek guztiak EAJ/PNV-k eta PSOE/PSE-k gobernatzen duten Arabako Foru Aldundiaren aurreikuspen zein aurrekontu-finantzaketa falta azaltzen du", salatu du Kepa Gonzalez Orain Amurrioko zinegotziak. "Halaber, Foru Aldundiak udal-eremu diren baliabide eta eskumen horiek zuzentzen jarraitu nahi izateak, batetik, udalen ahalduntzea zein gaitasunak ukatzen ditu eta, bestetik, neurri handi batean, eredu zentralizatu eta pribatizatua ezkutatzen du".
Herritarrenganako arreta hurbila hobetuko luketen Gizarte Zerbitzu publikoak kudeatzeko beharrezko giza baliabideak eta baliabide ekonomikoak ezartzea eskatu zuen Orain Amurriok udalbatzan.