Udal Araudi bat egiteko zirriborroa aurkeztu du Amurrioko EH Bilduk. Amurrioko Udalaren eta bere organoen funtzionamendua arautzea da helburua. Izan ere, talde politikoaren iritziz, Amurriok ez du udalaren antolaketa, funtzionamendua eta gobernantza arautzeko araudi argirik, eta hori da tokiko erakundearen "gabezia handienetako" bat, EH Bilduren hitzetan.
Araudi falta horrek eguneroko funtzionamenduan bidegabekeriak sortzen dituela azaldu dute. Zirriborroa osatzeko euskal araudia hartu du EH Bilduk erreferentziatzat.
Udal funtzionamenduaren araudi falta hori Amurrioko Udalaren "gabezia handienetako bat" dela uste du EH Bilduk
"Araudi argia eta zehatza izan nahi dugu, informazioa eskuratzeko modua arautzeko, eztabaidak eta ekimenen tramitazioa arintzeko, udal eztabaidak antolatzeko orduan arbitrariotasuna saihesteko eta herri ekimenak izapidetzeko bideak ezartzeko", azaldu du Iñaki Ibarluzea bozeramaileak. Koalizio abertzaleak sei hilabeteko epea proposatu du araudi berri hori Udal Osoko Bilkuran eztabaidatua, adostua eta idatzia izan dadin.
Zirriborroa mahai gainean
EH Bilduk aurkeztutako zirriborroak, besteak beste, zinegotziek euren jarduera garatu ahal izateko beharrezkoa duten informazioa eskuratzeko eskubidea izatea proposatzen du. Dokumentuak zinegotziek egoki ikusten dituzten ekimenak aurkeztu, izapidetu eta eztabaidatzeko duten eskubidea ere azpimarratu du, arreta berezia jarriz informaziorako eskubidean eta udal-espedienteetarako sarbidearen bermatzean.
Udal-organoen eraketa eta funtzionamenduaren gaineko proposamenak ere biltzen ditu zirriborroak. Euskararen erabilera, aurrez aurre eta urrutitik saioak egiteko aukera edota bilkuretako gai zerrenda arautzea dira, besteak beste, proposamenaren helburuak.
Herritarren parte-hartzea
Administrazioarekiko harreman elektronikoa bermatu ahal izateko araudia ere ezartzen du proposamenak, baita herritarren eta udalaren arteko harremanen kasuan ere. Udalerrian erroldatutako pertsona guztiek, erregistratutako entitate, elkarte eta erakundeek, elkarteek, elkargo profesionalek, sindikatuek, enpresaburuen elkarteek eta zuzenbide publikoko korporazioek zein herritarren plataforma, foro edo sareek udal-jardueran parte hartu ahal izatea bermatu nahi du EH Bilduk aurkeztutako araudi zirriborroak.
"Horrela, mozioak, eskaerak eta galderak aurkeztu ditzakete, osoko bilkurara joan, batzordean entzunak izan, eskaerak egin edo herri-ekimenak aurkeztu. EH Bilduk herritarrek mozioak aurkeztearen alde egin du. Bozeramaileen Batzordeak erabakiko du eztabaida, gutxienez erroldaren % 10ek bermatzen duenean izan ezik. Kasu horretan, hurrengo osoko bilkurako gai-zerrendan sartuko da, eztabaidatu dadin", argitu du oposizioko udal taldeak.