Amurrioko epaitegiaren fatxada gorriz margotuta azaldu zen duela zenbait egun, Galder Barbado eta Aitor Zelaiaren aurkako epaiketaren sententzia argitaratu berritan. PSE-EEk oharra bidali du gertaera salatzeko, eta PPk ere egin ditu adierazpenak. Ernaik, bere aldetik, kartel bidez zabaldu du ekimena gaur goizean, sare sozialetan:
Ez gara errepikatzeaz nekatuko:
— Ernai Aiaraldea (@ErnaiAiaraldea) February 5, 2021
❌ EZ DUGU ONARTZEN ABSOLUZIOA EZ DEN BESTE EPAIRIK!
Aitor eta Galder gurekin nahi ditugu!
Orain inoiz baino gehiago, kaleak hartzeko garaia da!#EzDuguOnartzen pic.twitter.com/Uctt0W0pjm
PP eta PSE-EEk Amurrioko epaitegiaren aurkako ekintza gaitzetsi dute oharretan. Sozialiastek azken asteetan Amurrion izandako "gertaera bandalistak" gaitzetsi dituzte. "Kondena eta gaitzespen indartsuena" berretsi dute: "Berriro ere eraso bandalikoak jasaten ari gara gure instituzio eta eraikinetan tinta antidemokratikoekin". Erantsi dutenez, horrelako ekintzak deitoragarriak eta aitzakia gabeak dira, "eta ez diote ekarpenik egiten Amurrioko irudi eta elkarbizitzari".
Aiarako PPk, berriz, honakoa esan du: "Ezin da zigorgabetasuna eskatu garai berri batean gaudela argudiatuz, eta legea betearazi behar duenari errua bota". Montse Canive Amurrioko PPko ordezkariak erantsi duenez, "mundu guztiak jakin behar du delitu-jarduerek ondorio penalak dituztela, eta egiten dituena baino ez da erantzule"
Urtarrilaren 21ean, Galder Barbado gazte amurrioarraren aurkako epaiketa egunarekin kointzidituz, antzeko ekimena burutu zuen Ernai gazte antolakundeak, "absoluzioa ez zen beste epairik" onartuko ez zutela aldarrikatzeko.