ANkerkeriari Stop plataformak deituta, Euskal Herriko zenbait herritan elkarretaratzeak egin dituzte gaur 12:00etan, Galder Barbado amurrioarrari eta Aitor Zelaia gasteiztarrari elkartasuna adierazteko. Biak ala biak Madrilgo Auzitegi Nazionalean epaitu zituzten, eta epaileak launa urteko espetxe zigorra ezarri zien bi gazteei. Euskal Herri mailako erantzuna eman diote gaur sententziari, ANkerkeriari Stop plataformako deialdiari jarraiki. Hala, eguerdian Urduñan, Orozkon eta Laudion egin dituzte elkarretaratzeak eskualdeari dagokionez. Arratsaldean, berriz, Amurrion eta Gasteizen burutu dituzte manifestazioak, 18:00etan.
Amurrioko manifestazioa
Amurrion, 350 lagun baino gehiago atera dira kalera Galder Barbadori eta Aitor Zelaiari babesa ematera. Juan Urrutia plazatik abiatu da mobilizazioa, eta San Anton plazan bukatu da. "Gasteizko eta Amurrioko kaleetan batu gara beste behin ere, ankerkeriari aurre egiteko. Gaurkoan sustraiak frankismorik ilunenean oinarrituta dituen Auzitegi Nazionalak Galder eta Aitorren kontra ezarritako sententzia salatu nahi dugu", adierazi dute bozeramaileek.
Errepresioaren bidez "herri hau isiltzeko" nahia kritikatu dute, eta epaiketa "fartsa" izan dela azpimarratu dute. ANkerkeriari Stop plataformako kideen ustetan, konpromiso eta jardun politikoa da epaitu dutena. Aipatu dutenez, helegitea jarriko dute Entzutegi Nazionalean, "sententzia honekin ezer da ezer amaitzen".
Aurrera begira, "bide berriak" irekiko dituzte hainbat sektoretan, "herri hau zigortzeari uzteko, eta ANkerkeriarekin amaitzeko". Azpimarratu dutenez, "antolakuntza, elkartasuna eta maitasuna izan dira herri honek hamarkadetan zehar erakutsitako baliorik handienak".