Kutxazain bat jarriko du Amurrioko Udalak Herritarren Arretarako Zerbitzuaren (HAZ) sarreran. Urtarrileko Udal Osoko Bilkuran onartu zuten proiektua finantzatzeko kreditu-transferentzia, aho batez. “Duela hiru urte, HAZ berria diseinatu genuenean, toki bat erreserbatu genuen etorkizunean kutxazaina jartzeko”, gogorarazi zuen Txerra Molinuevok udalbatzan.
Alkateak azaldu duenez, orain arte banku baten bidez egiten zituzten zergen eta antzeko tramiteen ordainketak, “baina akordio hori amaitu egin da”.
Kutxazainak bi gauza egiteko aukera emango ditu: ordainketak eta errolda-paperak. Azpiegitura arratsaldez ere erabili ahalko da, baina ordutegi baten barruan, “gauez itxi egin beharko delako”. Gainera, kutxazain sistema horrek baditu beste modulu batzuk, beste tramite batzuk egiteko balio dutenak, eta etorkizunean gehitu ahalko liratekeenak, Molinuevok zehaztu duenez. “Udaleko sail bakoitzak dituen beharrak zehaztu beharko ditu, zein berrikuntza gehitu erabakitzeko”.
Kritikak
Udalbatzan dauden talde politiko guztiek bozkatu zuten erabakiaren alde, baina bankuei zuzendutako kritikak ez ziren falta izan. “Izugarriak dira finantza entitateak herritarren arretari begira egiten ari diren murrizketak. Bulegoak ixten eta ordutegiak murrizten ari dira eta orain uko egin diote administrazioei zerbitzua eskaintzeari eta hauek dira dirua jarri behar izan dutenak”, salatu zuen Orain Amurrio taldeko Kepa Gonzalezek.
EH Bilduk ere antzeko hausnarketa plazaratu zuen. “Ados gaude erabakiarekin, baina ez dugu ahazten zeren ondorioa den”, nabarmendu zuen Iñaki Ibarluzea zinegotziak, “hau ez da udalak besterik gabe hartu duen erabakia, halabeharrez hartu behar izan du, bankuek uko egin diotelako zerbitzua emateari”.