Iaz baino 2,7 milioi euro gutxiago izango dute Amurrioko udal aurrekontuek aurten. 15,4 milioi euroko plangintza ekonomikoa adostu du EAJren udal gobernuak PSE-EErekin. “Erantzukizunagatik, aurrekontu errealistak aurkeztu ditugu, egungo egoerara egokituak”, adierazi dute Txerra Molinuevo alkateak eta David Romero zinegotzi sozialistak, “COVID-19ren pandemiak asko baldintzatu du aurrekontua, Arabako Foru Aldundiaren diru-bilketaren jaitsierarengatik”.
Helburu nagusi bat izango du plangintza ekonomikoak, Molinuevok nabarmendu duenez: “pertsonak udal politikaren erdigunean jartzea eta zerbitzu publikoak hobetzea”. Modu horretan, COVID-19ak gehien kaltetu dituen “pertsona eta sektore ekonomikoak” babestea izango da udalaren lehentasuna.
2,4 milioi euro inbertsioetan
Aurrekontuen %16,15a (2.487.700 €) bideratuko da inbertsioetara, udal gobernuak aurreratu duenez.
Hauek dira egingo diren inbertsio nagusiak:
Etxegoien bidean aparkaleku bat eraikitzea eta zonaldeko argiteria berriztatzea, energia-eraginkortasun irizpideak jarraituta.
- Larrabeko zabortegia behin betiko zigilatzea.
- Udalerriko saneamendu-sareak berritzeko lanei jarraipena ematea.
- Skate park bat eraikitzea.
- Ludoteka egokitzea.
- Padel eta tenis pista estaliak eraikitzea Reforren.
- Berdintasun Sailak emakumearen etxearen inguruko diagnostikoa lantzea eta Amurrioko V. Berdintasun Plana eratzen hastea.
Gizarte zerbitzuetako partida gora
Gizarte zerbitzuetara bideratutako diru-partida handitzea aurreikusi du udal gobernu taldeak, eta diru gehiago emango diote Apymca elkarteari merkataritzarako bonu-kanpainak abiatzeko.
Enpleguari bideratutako partida bere horretan mantendu dute, 408.569 euro bideratuta. “Gainera, 167.000 euro bideratuko dira udalerriko Administrazio Batzarretan egin beharreko jardueretara, eta 100.000 euro auzoetako batzarretatik sortutakoetara”.
Kulturari dagokionez, iaz abiatutako ildoa jorratzen jarraitzeko asmoa du udal gobernuak, kalean kultur ekitaldiak antolatuta. Horrez gain, 771.705 euro bideratuko dira guztira udalerriko elkarteak laguntzera, aurrekontuaren %5.
Adostasun “ahalik eta handienaren” bila
EAJk eta PSEk gehiengo absolutua dute udalbatzan. Gauzak hala, ez dute nahitaez oposizioko beste taldeen -EH Bildu eta Orain Amurrio- oniritzia behar aurrekontuak onartzeko. Hala ere, David Romerok aurreratu du “ahalik eta adostasun handiena” erdiesten ahaleginduko direla. “Indarrak batzeko eta gobernu taldearekin elkarlanean aritzeko unea da. Amurriok erantzukizun hori merezi du, herritarrek egungo egoera konplexuan ditugun ezberdintasunak alde batera uzteko eskatzen digute”.