Abenduaren 10ean eta 16an, zein urtarrilaren 25ean eta 27an greba egunak antolatu zituzten STEILAS, ELA eta LAB sindikatuek Euskal Herrian. Aiaraldea ere ez zen salbuespena izan. Dinamikak otsailean ere izan du segida, Amurrion burututako elkarretaratzea da horren lekuko. "Lotsagarria eta erantzukizun politiko eskasa izatea iruditzen zaigu EAEko Hezkuntza Saileko arduradunen negoziatzeko borondate eza eta langileon aldarrikapenei horrela muzin egitea", adierazi dute.
"Haurreskolak Patzuergoaren etorkizuna hezkuntza zerbitzu honen doakotasunean eta Hezkuntza Sailean integratzearekin bermatuko dela uste dugu. Bada garaia 0-3 urteko lehen zikloari merezi duen aitortza emateko"
Hezkuntzako langileen hitzetan, birritan atzeratu diete bilera: "Jokin Bildarratz lehendakari duen Haurreskolak Patzuergoko Zuzendaritza batzordea ez da bildu. Batzordera eraman nahi zituzten akordioak ez dituzte eraman, beraz, ematen du alde bakarrez momentuz ez dituztela berrikusi".
Amurrioko partaideek negoziazio kolektiboaren kontrako eraso zuzentzat hartu dute isiltasuna, "alde sozialaren lana oztopatzeko eta ikusezin bihurtzeko ahalegina dela salatu nahi dugu". Zentzu horretan, hezkuntza kalitatearen eta hobekuntzen defentsan jarraitzeko asmoa berretsi dute: "Haurreskolak Patzuergoaren etorkizuna hezkuntza zerbitzu honen doakotasunean eta Hezkuntza Sailean integratzearekin bermatuko dela uste dugu. Bada garaia 0-3 urteko lehen zikloari merezi duen aitortza emateko". Horrez gain, sektore horretako lanpostuetan behin-behinekotasun handia dago, azaleratu dutenez.
Eskaera zehatzak
Ondorengoak dira mobilizazio bidez aldarrikatu dituzten eskaerak:
- Haurreskolak Patzuergoaren doakotasuna eta integrazioa Hezkuntza Sailean.
- Akordioak errespetatu eta betetzea.
- Lan hitzarmen berria negoziatzea.
- Langileen behin-behinekotasun tasarekin bukatzea eta lanpostuak egonkortzea.
- Irakaskuntza publikoan Osakidetzaren Norbera Babesteko Ekipamenduen horniketan Haurreskolak Patzuergoa gehitzea.
- Aurrekontua handitzea.