Aho uhal lana aurkeztu zuen atzo Olatz Salvador abeslariak Amurrio Antzokian. Aforoa beteta, ordubete luzez jo zuen. "Ilusio handiz gatoz hona, eta espero dugu ilusio hau zuei ere transmititzea", adierazi zuen emanaldiaren hasieran. Hain zuzen, Aho uhal abestiarekin ekin zion ikuskizunari, bigarren diskoaren izena daraman lanarekin.
"Zorteduna" dela aitortu zuen musikariak, nahiz eta askotan "zintzilik" sentitu. Argiz eta ahotsez dotore jantzi zuten ikuskizuna bandako kideek, bakarka, binaka zein taldean plazaratutako kantuak lagun. Entzuleak ere jarri zituen abesten, tartean pieza bakoitzaren istorioak eta gogoetak partekatuta.
Sustraiak kantuaren aurkezpenean, esaterako, hankak lurrean izatearen garrantzia aipatu zuen, "baina oso inportantea da ere norbaitek gogoratzea hegan egin daitekeela". Minari, beldurrei edota erabakiak hartzeko zailtasunei goxotasunetik kantatu zien donostiarrak, besteak beste: "Bukaera zoriontsuetara ohituta gaude, baina istorioen amaierak ez dira beti espero bezalakoak, eta hortik ikasten dugu".
Datozen bi egunetan Elorrion eta Irunen eskainiko ditu kontzertuak, sare sozialetan aipatu duenez. Duela gutxi plazaratu zuen bere bigarren bakarkako lana: "Oso pozik gaude izandako harrerarekin. Zortedunak gara eta hau ere zuekin konpartitu nahiko genuke".
