Amurrioko EH Bilduk iragarri du prestutasuna duela 2021ko aurrekontuak babesteko. Horretarako bi baldintza jarri dizkio koalizioak EAJri: "aurrekontuak diseinatzeko eta onartzeko prozesua gardena eta parte-hartzailea izatea eta 2018ko aurrekontuetan adostutako proiektuak modu erabakigarrian bultzatzea."
Azken egitasmo horien artean daude etxebizitzari buruzko ikerketa eta Aresketamendiko egokitzapena. Horrez gain, antza, skate parka aurten handituko dute, "EH Bilduk 2018an proposatu bezala".
Edonola ere, koalizioak exijentzia zehatza egin die EAJri eta PSE-EEri aurrekontuen alde bozkatzeko: adostasun dokumentua sinatzeko konpromisoa. "Akordio horren arabera, udal gobernuak kontu batzorde bat deituko du uztailean, urteko lehen seihilekoan kontsumitu ez den kredituaren azken xedea erabakitzeko, bai eta data horietarako gauzatuko ez direla jakiten den beste partida batzuena ere".
Testu horretan bestelako edukiak ere jasotzen dira: "EAJk eta PSE-EEk konpromisoa hartu dute 2018an EH Bilduk eta EAJk sinatutako akordioaren unera arte egindako ekintzak aztertzeko eta egin gabe dauden puntuen gauzatzea programatzeko".