Araudiaren arabera, Gasteiz, Laudio eta Amurrioko klubek (hau da 5.000 biztanle edo gehiagoko udalerrietakoek) talde filial edo dependenteren bat izan behar dute Erregionaleko Lehen Mailan edo beste kategoria apalagoan. Giltzarrapok ez du, ordea, horrelakorik.
"Talde xumea gara, baina gure jokalari guztiak dira amurrioarrak. Ez diogu zentzu handirik ikusten arauari, talde askok ez baitute herriko jokalaririk. Ezin izan dugu talde filialik sortu, are gutxiago pandemia egoeran. Aurten liga beranduago hasi da eta ez genekien ezta jokatuko ote zen. Kaskagorrirekin akordioa lortzen saiatu ginen, baina Amurrio Clubarekin dute hitzarmena", azaldu du Borja Guillen Giltzarrapoko ordezkariak.
Nahiz eta igotzeko paradarik ez izan, Giltzarrapok federazioari eskatu dio Play-offak jokatzeko aukera ematea, baina ezezkoa jaso dute. Berez, jardunaldi bakarraren faltan, Giltzarrapo da Arabako Erregionaleko Lehen Mailako burua, eta 2 puntuko abantaila du bigarrenari dagokionez. "Play-offetan egoteko txartela bagenuen, lehenengo hiru taldeak sailkatzen baitira", aipatu du Borja Guillenek.
Gauzak horrela, hurrengo denboraldira arte itxaron beharko du Giltzarrapok, eta filiala sortu, kategoria igotzeko.