Bilboko BBK-Mendi Film nazioarteko zinema jaialdiko pelikula irabazleen proiekzio ibiltaria da Mendi Tour egitasmoa. Abenduan egiten den zinemaldiko lanik sarituenak Euskal Herritik aretoz areto bidaiatzen dute urte osoan Mendi Tour ekimenarekin, eta gaur (apirilak 16) Amurrio Antzokian eskainiko dituzte jaialdiko zenbait pieza saritu. Arriesgarse a vivir, L’Escalade libérée eta Everest - The Hard Way dira hiru pelikulak.
Arriesgarse a vivir 2020ko jaialdiko pelikula irabazlea izan zen Zabalandi sailean. L’Escalade libérée lan frantsesa da eta epaimahaiaren saria jaso zuen iazko edizioan.
Azkenik, Everest - The Hard Way izen beretsuko liburua du oinarri, eta ikusleen saria eskuratu zuen Mendi Film jaialdiko 2020ko edizioan. Hiru pelikula horiek 37, 22 eta 52 minutuko iraupena dute, hurrenez hurren.
Sarrerak
Mendi Tour proiekzioa ikusteko sarrerak eskuragarri daude 2 euroren truke Amurrioko Kultura Etxean. Proiekzioa baino lehen ere egongo da sarrerak erosteko aukera, Amurrio Antzokiko txarteldegian.