Jalgi Voz jaialdia Arabako zenbait herritara heltzen ari da eta horien artean dago Amurrio. Musika klasikoa eta lirikoa uztartzen duen ekimenak Santa Maria elizan izango du hitzordua larunbatean 19:30ean eta Claudio Monteverdi musikariaren lanak eskainiko dituzte Eres-Alkimia taldeko kideek. Musikarekin batera, hitzaldi didaktikoa eta letren dramatizazioa barne hartzen ditu ikuskizunak.
Emanaldia eskainiko duen musikarietako bat da Maite Arciniega. Zaraobe Institutuko irakaslea jaialdiaren antolatzaileetako bat da. Sustatzailea ez ezik, abeslaria ere bada eta publikoak larunbatean zer topatuko duen azaldu du: "Eres-Alkimia boskoteak Claudio Monteverdi (1597-1643) kremonarraren madrigalak eskeiniko ditu (nik neuk abesten dut boskotean!). Publikoak bidaia emozional batera joateko aukera izango du, non gerra (haserrea), lasaitasuna (moderazioa) eta maitasuna (umiltasuna), arimaren pasio edo afektu nagusiak direnak italiarraren aburuz, alkimista baten modura elkarrekin lotzen eta gainjartzen diren. Jose Miguel Baena itzultzaile, tenore eta aktore madrildarrak gidatuko gaitu alkimia emozionaleko bidaia horretan, gaztelaniazko testuen dramatizazioaz laguntzen den proposamen musiko-eszeniko baten bidez".