Udaltzaingoaren aurkako pintaketa bat egin zuten asteburuan Amurrioko Udaltzaingoaren egoitzako fatxadan bertan. Amurrioko Udalak eta PSE-EEren udal taldeak gogor salatu dituzte gertakariak.
Amurrioko Udalak oharra plazaratu du erasoa eta "udaltzainen aurkako indarkeria adierazpenak" gaitzesteko. Txerra Molinuevo alkatearen hitzetan, “horrelako ekintzek ez dute lekurik herrian”.
Era berean, tokiko erakundeak deia luzatu du horrelako ekintzak Amurriotik desagertu daitezen: "nahi dugun udalerri-ereduaren aurka doazelako, hau da, tolerantzian eta elkarbizitzan oinarritutako herria".
PSE-EEren salaketa
Amurrioko sozialistek ere gogor kritikatu dute gertatutakoa. Azken hilabetetan herritar konkretuen, enpresen edota eraikin publikoen aurkako "koakzio eta bandalismo" ekintza gehiago jaso direla ere salatu dute.
David Romero PSE-EEko udal-taldeko bozeramaileak iragarri duenez, adierazpen instituzional bat proposatuko dute hurrengo bozeramaileen batzordean, azken hilabeteetako gertakariak gaitzetsi eta "udaleko funtzionario publikoei elkartasuna adierazteko".
Sozialistek ere horrelako ekintzak bertan behera uztea eskatu diete egileei.